ბებიისა და შვილიშვილის მკვლელობაში მსჯავრდებულის განაჩენს უზენაესში გაასაჩივრებენ

ბებიისა და შვილიშვილის მკვლელობაში მსჯავრდებულის გენადი იაკობაძის ადვოკატმა რამინ პაპიძემ ახალციხის რაიონული სასამართლოს გადაწყვეტილება, რომლის თანახმადაც მისი დაცვის ქვეშ მყოფს თავისუფლების აღკვეთა 20 წლით მიესაჯა, სააპელაციოში გაასაჩივრა.

პაპიძე მეორე ინსტანციის სასამართლოში ახალციხის რაიონული სასამართლოს გადაწყვეტილების ბათილად ცნობას და გენადი იაკობაძის გათავისუფლებას ითხოვდა. მისი თქმით, იაკობაძე ფსიქიკურად დაავადებულია, ეს ექსპერტიზითაც დგინდება და ამიტომ სასამართლომ მასზე გამამართლებელი განაჩენი უნდა გამოიტანოს.

სააპელაციო სასამართომ რამინ პაპიძის სარჩელი არ დააკმაყოფილა და პირველი ინსტანციის სასამართლოს გადაწყვეტილება ძალაში დატოვა. ადვოკატი აცხადებს, რომ მეორე ინსტანციის სასამართოს გადაწყვეტილებას უზენაესშიც გაასაჩივრებს და იგი აქაც გენადი იაკობაძისათვის გამამართლებელი განაჩენის გამოტანას მოითხოვს.

შეგახსენებთ, გენადი იაკობაძე დამნაშავედ ცნეს სისხლის სამართლის კოდექსის 236–ე მუხლის 1–ლი და მე–2 ნაწილით და ასევე, 109–ე მუხლის 1გ, 2ბ და 3 ა ნაწილებით.

გოგაშენში მომხდარი მკვლელობაც და ამ საქმეზე მიმდინარე სასამართლო პროცესებიც, რეგიონში ბოლო პერიოდში ყველაზე გახმაურებული მოვლენები იყო. შეგახსენებთ, მომხდარს აქციები და სოფელში დაპირისპირებები მოჰყვა, დაპირისპირებების ფონზე მიმდინარეობდა სასამართლო პროცესებიც ახალციხის რაიონულ სასამართლოში.

[თამუნა უჩიძე, ახალციხე]