დღეს, 7 აპრილს, ახალქალაქში, ბებიისა და შვილიშვილის მკვლელობაში ბრალდებული გენადი იაკობაძის საქმეზე ბოლო სასამართლო სხდომა გაიმართა. პროცესზე მხარეებმა საბოლოო სიტყვები წაიკითხეს. თუმცა, მანამდე დაცვის მხარემ სასამართლოში შუამდგომლობები დააყენა: ადვოკატმა რამინ პაპიძემ სასამართლოს წინაშე ჯერ ბრალდებულისთვის ფსიქიატრიული ექსპერტიზის ხელახლა დანიშვნისა და პატიმრობის ვადის გაგრძელების, შემდეგ კი მისი დაცის ქვეშ მყოფის მიმართ სისხლის სამართლებრივი დევნის შეწყვეტის შესახებ იშუამდგომლა. თუმცა, მოსამართლე გიორგი ლონდარიძემ პაპიძეს არცერთი შუამდგომლობა არ დაუკმაყოფილა.
ამის შემდეგ პროკურორმა ვასილ ოსიძემ საბოლოო სიტყვა წაიკითხა. მან დანაშაულის ჩადენის სხვა გარემოებებთან ერთად, ყურადღება იმაზე გაამახვილა, რომ იაკობაძემ ეს განზრახ ჩაიდინა.
„2011 წელს იაკობაძე პასუხისგებაში იყო მიცემული მუქარისთვის, მას უყვარდა გულნაზი ქართველიშვილი, ცოლობა სთხოვა, უარი მიიღო და ამის გამო დაემუქრა: გაგამწარებ, ცოლად თუ არ გამომყვებიო“, – განაცხადა პროკურორმა და დაამატა, რომ რადგან ბრალდებული დანაშაულის ჩადენის დროს შეზღუდული შერაცხადი იყო სასჯელისგან არ უნდა გათავისუფლდეს.
სწორედ ბრალდებულის შეურაცხადობაზე გააკეთა აქცენტი მისმა ადვოკატმა: „როცა გენადს შევხვდი, მითხრა ლალი მაისურაძე იდგა ავტომატით ხელში და იმიტომ ვესროლეო. აქედან გამომდინარე, აშკარაა, რომ მას ჰქონდა ბოდვა, ასევე პერიოდულად ჩაესმოდა ქალის ხმები, რომელიც დანაშაულის ჩადენისკენ მოუწოდებდა. ამიტომ იაკობაძე თავის ქმედებას ვერ აცნობიერებდა და იგი უნდა გათავისუფლებულიყო სისხლის სამართლებრივი პასუხისმგებლობისგან“.
პაპიძის განცხადებითვე, იაკობაძის საქმეზე გამართული ყველა სხდომა პროცესუალური დარღვევით ჩატარდა, რადგან მოსამართლე არცერთ მოწმეს ცრუ ჩვენების მიცემის შემთხვევაში სისხლის სამართლებრივი პასუხისმგებლობის შესახებ არ აფრთხილებდა. ასევე, მოსამართლე მოწმეებს ჩვენების მიცემამდე ფიცს არ ადებინებდა: „ამ ყველაფრის გარეშე აწერინებდა მოწმეებს ხელს გაფრთხილებაზეც და ჩვენებაზეც. ეს კი პროცესუალური დარღვევა და გამოდის, რომ სასამართლომ წაახალისა მოწმეები სწორი ჩვენება არ მიეცათ“.
კითხვაზე რაში სჭირდებოდა ეს მოსამართლეს, პაპიძემ გვიპასუხა: „შესაძლოა ეს სასამართლოს მხრიდან არაკომპეტენტურობის ბრალი იყო, ან შესაძლოა მიზანმიმართულადაც გაკეთდა“.
სასამართლომ დაცვის მხარის პოზიცია არ გაიზიარა, გიორგი ლონდარიძემ ბრალდებულს თავისუფლების აღკვეთა 20 წლის ვადით მიუსაჯა. გენადი იაკობაძე დამნაშავედ ცნეს სისხლის სამართლის კოდექსის 236–ე მუხლის 1–ლი და მე–2 ნაწილით და ასევე, 109–ე მუხლის 1გ, 2ბ და 3 ა ნაწილებით. 236–ე მუხლი თავისუფლების აღკვეთას ოთხი წლის ვადით ითვალისწინებს, თუმცა, დიდი სასჯელი შთანთქვას მიცრეს და ამიტომ მას თავისუფლების აღკვეთა 20 წლით მიესაჯა.
დაცვის მხარე ახალციხის რაიონული სასამართლოს გადაწყვეტილებას აუცილებლად გაასაჩივრებს. პაპიძე ლონდარიძის გადაწყვეტილებას უკანონოს უწოდებს. გაასაჩივრებს თუ არა ბრალდების მხარე აღნიშნულ გადაწყვეტილებას ჯერ უცნობია.
„ამას განაჩენის ჩაბარების შემდეგ გადავწყვეტთ“, – ამბობს პროკურორი.
შეგახსენებთ, გოგაშენში მომხდარი მკვლელობაც და ამ საქმეზე მიმდინარე სასამართლო პროცესებიც, რეგიონში ბოლო პერიოდში ყველაზე გახმაურებული მოვლენები იყო. შემთხვევას აქციები და სოფელში დაპირისპირებები მოჰყვა, დაპირისპირებების ფონზე მიმდინარეობდა სასამართლო პროცესებიც ახალციხის რაიონულ სასამართლოში.
[თამუნა უჩიძე, ახალციხე]