სამხარეო ადმინისტრაციაში რეგიონის განვითარების გეგმებზე იმსჯელეს

სოფლის მეუნრობის სამინისტროს სამცხე–ჯავახეთის რეგიონული სამმართველოს უფროსი ნანა ზუბაშვილი, სასოფლო–საკონსულტაციო სამსახურის დირექტორი გურამ ჯინჭეველაძე და ფერმერი ზაზა ივანიძე 29 დღის განმავლობაში იაპონიაში სამუშაო ვიზიტით იმყოფებოდნენ, სადაც სოფლის მეურნეობისა და აგროტურიზმის მიმართულებით იქაურ მიდგომებს გაეცნენ. იაპონიიდან დაბრუნების შემდეგ კი მომზადდა სამოქმედო გეგმა, როგორ უნდა განვითარდეს სამცხე–ჯავახეთი ამ ორი მიმართულების კომბინირებით.

სამცხე–ჯავახეთის სამხარეო ადმინისტრაციაში გამართულ შეხვედრაზე სოფლის მეურნეობის სამინისტროს სამცხე–ჯავახეთის სამხარეო რეგიონული სამმართველოს უფროსმა ნანა ზუბაშვილმა მუნიციპალიტეტების ხელმძღვანელებს აღნიშნული გეგმა გააცნო.

როგორც ნანა ზუბაშვილი განმარტავს, რეგიონის განვითარების სამოქმედო გეგმაში ჩადებულია სოფლის მეურნეობისა და ტურიზმის კომბინირებით სამცხე–ჯავახეთის შესახებ ცნობადობის ამაღლება, ასევე რამდენიმე მუნიციპალური გეგმის დამუშავება, პროდუქტის ბრენდირება და ფერმერთა ასოციაციების შექმნა.

„გვინდა ჯერ ახალციხის კარტოფილის ბრენდირებით დავიწყოთ, რომელსაც შემდეგ მოყვება ალკოჰოლური სასმელების ხილისგან წარმოება, თაფლის წარმოება და ასე შემდეგ“, – განმარტავს ზუბაშვილი.

მისივე თქმით, ამ გეგმის განხორციელება უახლოეს პერიოდში დაიწყება.

„დეკემბერში შევხვდებით ფერმერთა ჯგუფებს და ჩამოვაყალიბებთ ასოციაციებს, რომლებიც საქპატენტში გააკეთებენ განაცხადებს, ამაში ჩართული იქნება სამი არასამთავრობო ორგანიზაცია, შემდგომ იქნება დამუშავებული მუნიციპალური განვითარების გეგმები სოფლის მეურნეობისა და აგროტურიზმის კომბინირებით, იანვარ–თებერვალში კი შევარჩევთ სამ ფერმერს, რომლებთანაც მოხდება აგრო ტურის გაკეთება თავისი ინფრასტრუქტურით“, – ამბობს ნანა ზუბაშვილი.

რამდენად შესაძლებელია აღნიშნული გეგმის განხორციელება სამცხე–ჯავახეთში ამაზე რეგიონის გუბერნატორი საუბრობს.

"შერჩეულია სამიზნე მუნიციპალიტეტები, სადაც შეიძლება განხორციელდეს ის კონკრეტული ინიციატივები, რომელსაც მუნიციპალური საწარმო შექმნა ჰქვია. ეს ყველაფერი სამცხე–ჯავახეთს წაადგება იმაში, რომ ბრენდის სახე ექნება მიცემული და ცნობადი იქნება საქართველოს და შემდეგ უკვე ქვეყნის საზღვრებს გარეთ“, – ამბობს სამცხე–ჯავახეთის გუბერნატორი აკაკი მაჭუტაძე.



[თამარ თოთაძე, ახალციხე]