ბორჯომს 'მოსიარულე ბიბლიოთეკა' ეწვევა

ცენტრალურ პარკში სხვადასხვა ღონისძიებები 12:00 საათიდან დაიწყება.

12:00–დან 18:00 საათამდე პარკის შესასვლელში განთავსდება გამომცემლობების პავილიონი, სადაც სხვადასხვა გამომცემლობა მოაწყობს წიგნების გამოფენა-გაყიდვას. იქნება ფასდაკლებები. გარდა ამისა, ამავე პერიოდში მოეწყობა ხელნაწერთა ეროვნული ცენტრის გამოფენა "ხელნაწერი წიგნის შექმნა"; ქართველი კალიგრაფების ნამუშევრების გამოფენა და კალიგრაფიული შესრულების საჯარო ჩვენება დაინტერესებული საზოგადოებისთვის;

12:00-15:00 საათზე დაინტერესებულ საზოგადოებას საშუალება ექნება მონაწილეობა მიიღოს ლიტერატურულ ბლიც კონკურსში;

16:00 საათზე შედგება პოეზიის საღამო და ადგილობრივი მკითხველების შეხვედრა ახალგაზრდა პოეტებთან: ნინო სადღობელაშვილთან, თორნიკე ჭელიძესა და თამთა გრიგოლიასთან.

16:30 საათზე შედგება ლიტერატურული ბლიც კონკურსის გამარჯვებულთა დაჯილდოვება.

ღონისძიებებს კლასიკური მუსიკით გააფორმებს სიმებიანი კვარტეტი; პროექტის მიმდინარეობისას ბორჯომის ცენტრალურ პარკში მოეწყობა ტრადიციული ქართული ჩაის კუთხე და დეგუსტაცია;

"ლიტერატურული დღეები" - ასე ჰქვია პროექტს, რომელიც რამდენიმე კომპონენტს მოიცავს და სხვადასხვა პარტნიორთან ერთად ხორციელდება. პროექტის მთავარი მიზანია ადგილობრივი ახალგაზრდების წიგნიერების დონის ამაღლება, ლიტერატურული, შემოქმედებითი გარემოს შექმნა და რეგიონში საგანმანათლებლო პროექტების განხორციელება;

ბორჯომში ღონისძიებები ბორჯომის მუნიციპალიტეტის ორგანიზებითა და სპორტისა და ახალგაზრდობის სამინისტროს სსიპ ბავშვთა და ახალგაზრდობის განვითარების ფონდის მხარდაჭერით დაიგეგმა.