განათლების მინისტრმა სამცხე–ჯავახეთში პედაგოგებს მასწავლებელთა შეფასების სქემა გააცნო

შეხვედრა სამცხე–ჯავახეთის სახელმწიფო უნივერსიტეტში შედგა. სქემის შესახებ განათლების მინისტრი და მისი მოადგილეები, ერთ საათს საუბრობდნენ.

სამინისტროს წარმომადგენლები საუბრობდნენ იმის შესახებ, რა მიზანი აქვს ამ სქემას და რამდენად მნიშვნელოვანია მისი დანერგვა.

„მასწავლებლის საქმიანობის დაწყების, პროფესიული განვითარებისა და კარიერული წინსვლის სქემა 2016 წლიდან უნდა დაინერგოს, როგორც დედაქალაქის. ასევე რეგიონის უნივერსიტეტებში. სწორედ ამიტომ, ძალიან მნიშვნელოვანია უნივერსიტეტების ჩართულობა. პედაგოგები როგორც დედაქალაქში, ისე რეგიონებში, მაღალკვალიფიციურად უნდა მომზადდნენ“, – განმარტა საქართველოს განათლებისა და მეცნიერების მინისტრმა თამარ სანიკიძემ.

შეხვედრაზე ძირითადი აქცენტი არაქართულენოვანი მასწავლებლების პროფესიული განვითარებისა და კარიერული წინსვლის ხელშეწყობის დამატებით მექანიზმებსა და მათი ქართული ენის კომპეტენციების განვითარებაზე გაკეთდა.

როგორც სამინისტროს წარმომადგენლებმა განმარტეს, აქამდე არსებული სისტემა ვერ უზრუნველყოფდა არაქართულენოვანი სკოლების მასწავლებლებისთვის ვერც საგნობრივი და ვერც პროფესიული უნარების გამოცდების ჩატარებას მათ მშობლიურ ენაზე. ახლა კი ამაზე მუშაობა დაწყებულია.



შეხვედრაზე ითქვა, რომ განათლების სამინისტრო საგნობრივი ჯგუფის მასწავლებლების მომზადებასაც გეგმავს. როგორც მინისტრის მოადგილემ გიორგი შარვაშიძემ განმარტა, დეფიციტურ სკოლებში ერთ მასწავლებელს რამდენიმე საგნის სწავლება უწევს, ამისთვის კი პედაგოგების გადამზადება გახდა საჭირო.

სამინისტროს წარმომადგენლებმა პედაგოგების ხელფასების გაზრდაზეც ისაუბრეს და პრეზენტაციის სახით 2014– 2017 წლებში მასწავლებლების საშუალო ანაზღაურების მაჩვენებელი აჩვენეს.

„2014 წელს მასწავლებლის საშუალო ანაზღაურება 360 ლარი იყო, 2015 წელს კი 440 ლარს შეადგენს, 2016 წელს მასწავლებლის საშუალო ხელფასი 510 ლარი იქნება, 2017 წელს კი 830 ლარს მიაღწევს. გარდა ამისა პედაგოგები გარკვეულ თანხას დანამატის სახითაც აიღებენ“, – ნათქვამი იყო პრეზენტაციაში.

სამუშაო შეხვედრაზე აქცენტი გაკეთდა ბილინგვური მასწავლებლის, როგორც დამატებითი კვალიფიკაციის მქონე პედაგოგის საუნივერსიტეტო მომზადებაზეც. ახალი სასწავლო წლიდან უნივერსიტეტებში, მათ შორის სამცხე – ჯავახეთის სახელმწიფო უნივერსიტეტში ამოქმედდება „მასწავლებლის მომზადების ინტეგრირებული პროგრამები და მულტილინგვური მოდული“.

პრეზენტაციის შემდეგ შეხვედრა კითხვა – პასუხის რეჟიმში გაგრძელდა. სამცხე – ჯავახეთის სახელმწიფო უნივერსიტეტის პროფესორ – მასწავლებლებს კითხვები ძირითადად მასწავლებლის საქმიანობის დაწყების, პროფესიული განვითარებისა და კარიერული წინსვლის ახალ სქემაზე ჰქონდათ.



[მანანა სარაშვლი, ახალციხე]