რა შენიშვნები აქვს ახალციხის მაჟორიტარ დეპუტატს 2016 წლის სახელმწიფო ბიუჯეტთან დაკავშირებით

რეგიონებში 2016 წლის სახელმწიფო ბიუჯეტის პროექტის საჯარო განხილვები მიმდინარეობს. აღნიშნული პროექტი 2 ნოემბერს ახალციხეში საქართველოს პარლამენტის, სამინისტროებისა, ადგილობრივი ხელისუფლებისა და არასამთავრობო ორგანიზაციების წარმომადგენლებმა განიხილეს.

ახალციხის მაჟორიტარი დეპუტატი "ერთიანი ნაციონალური მოძრაობიდან" ვაჟა ჩიტაშვილი ამბობს, რომ ენმ აღნიშნულ პროექტს მხარს არ დაუჭერს.

"ფაქტობრივად ბიუჯეტში არ არის გათვალისწინებული პენსიის მატება და ძალიან გაბერილია მთავრობის შენახვის ხარჯები, ამით თავისუფლად შეიძლებოდა პენსიონერებისთვის 50 ლარამდე პენსიის მატება. ამ და სხვა მოსაზრებების გამო ჩვენ ბიუჯეტს მხარს არ დავუჭერთ", – ამბობს ვაჟა ჩიტაშვილი.

დეპუტატმა 2016 წლის სახელმწიფო ბიუჯეტის განხილვის დროს პარლამენტისა და ფინანსთა სამინისტროს წარმომადგენლებს საკუთარი შენიშვნები გააცნო. მისი თქმით, უკეთესი იქნებოდა სახელმწიფო აპარატის ხარჯების შემცირების ხარჯზე პენსიები გაზრდილიყო. გარდა ამისა, დღევანდელ შეხვედრაზე ჩიტაშვილმა რეგიონში გაზიფიცირების საკითხიც დააყენა. ვაჟა ჩიტაშვილმა განმარტა, რომ სამცხე–ჯავახეთში საკმაოდ მკაცრი კლიმატური პირობებია და თითოეულ სოფელს სჭირდება გაზიფიცირება. ამასთან, რეგიონში უკვე აღარ არსებობს საშეშე მერქანი და ადგილობრივები სამასალე მერქანს იყენებენ.

"გაზიფიცირებისთვის დამატებით შეიძლებოდა, რომ მუნიციპალიტეტისთვის მილიონი ლარი მაინც გამოყოფილიყო", – მიმართა დეპუტატმა ცენტრალური ხელისუფლების წარმომადგენლებს.

ვაჟა ჩიტაშვილის შენიშვნებთან დაკავშირებით დღევანდელ შეხვედრაზე აღინიშნა, რომ 2016 წლის სახელმწიფო ბიუჯეტში პენსიების ზრდა ჩადებული არ არის. ხოლო რაც შეეხება გაზიფიცირების პროცესს, ამისთვის გარკვეული თანხები გათვალისწინებულია, თუმცა, კონკრეტულად სად რა იგეგმება, შეხვედრის მონაწილეებისთვის ცნობილი არაა.

[თამარ თოთაძე, ახალციხე]