ვაჟა ჩიტაშვილი 'სამხრეთის კარიბჭეში'გასულ „დღის კითხვას“ ეხმაურება

საპარლამენტო უმცირესობის წევრის ვაჟა ჩიტაშვილის განცხადებით, ის მოქალაქეები, რომლებიც აცხადებენ, რომ ახალციხის მაჟორიტარ დეპუტატს არ იცნობენ, უბრალოდ დაიბნნენ.

„ვნახე თქვენი დღის კითხვა, ძალიან გამიკვირდა, იმიტომ კი არა, რომ ძალიან ცნობადი სახე ვარ და ყველა უნდა მიცნობდეს. უბრალოდ იმიტომ, რომ ვინც თქვენ ქუჩაში გამოკითხეთ, მათი უმრავლესობა ჩემი ახლობელი და ნათესავია“, – ამბობს ჩიტაშვილი.

ასევე, მისი განცხადებით, „სამხრეთის კარიბჭის“ მიერ გამოკითხული ერთ–ერთი ქალბატონი მასთან რამდენიმე დღის წინ იყო მისული: „პრობლემები ჰქონდა სამასალე ხის გამოწერასთან დაკავშირებით, ეს საკითხი დადებითად გადაწყდა და მან სამასალე ხისთვის ბილეთი მიიღო“.

დეპუტატი მიიჩნევს, რომ „სამხრეთის კარიბჭემ“ კითხვა არასწორად დასვა: „თქვენ ჰკითხეთ, ვინ არის ახალციხის მაჟორიტარი დეპუტატი. მათ შეიძლება იფიქრეს ქალაქის დეპუტატებზე, მაგალითად, გელა პეტაშვილზე, ამბარცუმ ბაბოიანზე და ამიტომ დაიბნენ. უკეთესი იქნებოდა კითხვა დაგეზუსტებინათ და პარლამენტიც გეხსენებინათ“.

[თამუნა უჩიძე, ახალციხე]