ენმ ახალციხე პლაკატების გაკვრაზე – ‘ეს არის ჩვენი ხელისუფლების სახე’

"ერთიანი ნაციონალური მოძრაობის" საწინაღმდეგო შეურაცხმყოფელი პლაკატები ძირითადად ცენტრალურ ქუჩებშია გაკრული. მათ შორის "ერთიანი ნაციონალური მოძრაობის" ახალციხის რაიონული ორგანიზაციის შენობის ფასადზე, სადაც ამავდროულად სასტუმრო და გაზის კომპანიაა განთავსებული.

პლაკატები გაკრულია ყოფილი მერიის შენობასა და ცხრა აპრილის ქუჩაზე, მშენებარე კორპუსის ღობეზე.

აღნიშნულ ფაქტს "ნაციონალური მოძრაობის" ახალციხის რაიონულ ორგანიზაციაში გამოეხმაურნენ. პარტიაში ფიქრობენ, რომ ეს იმ ერთკვირიანი კამპანიის გაგრძელებაა, რაც გასულ კვირას, აქციებით დაიწყო.

"თავიდან დაიწყეს კარის აჭედვით, მერე საღებავების შესხმით, დღეს, მოგეხსენებათ, „რუსთავი 2“–ის სასამართლო პროცესი მიმდინარეობს და აგერ პლაკატები დაგვახვედრეს. ალბათ პარასკევს განმეორდება ასეთი მოვლენა, რადგან იგივე პროცესი გაიმართება. ეს ჩვენთვის მოულოდნელი არ არის, მაგრამ მიკვირს ერთი რაღაც, რომ ჩვენ გვყავს ხელისუფლება, რომელიც უნდა ცდილობდეს, ხალხი ერთმანეთს კი არ დაუპირისპიროს, არამედ საერთო ენა გამონახონ", – ამბობს "ერთიანი ნაციონალური მოძრაობის" ახალციხის რაიონული ორგანიზაციის თავმჯდომარე მალხაზ გიქოშვილი.

მისივე თქმით, ამ ფაქტს გამოხატვის თავისუფლებას ვერ უწოდებს, ეს არის ვანდალიზმი: "ჩერგოლეიშვილმა ერთი პლაკატი გააკრა და დაიჭირეს, ქალაქში მოძრაობენ ბავშვებიც, ნუთუ სამართალდამცავებმა ვერ დაინახეს?!"

"ერთიანი ნაციონალური მოძრაობის" ახალციხის რაიონულ ორგანიზაციაში ამბობენ, რომ აღნიშნული ფაქტის შესახებ სამართალდამცავი ორგანოებისთვის არ მიუმართავთ, რადგან მათგან რეაგირებას არ ელოდებიან.

"რა მიმართვა უნდა, მთელ ქალაქში ეს პლაკატებია გამოკრული, კარი აგვიჭედეს, მაშინ არაფერი არ გაკეთებულა, საღებავები შეასხეს, ძიებაშია ეს პროცესი, ალბათ ესეც ძიებაში იქნება და ალბათ პარასკევს კიდევ ახალი დაემატება", – ამბობს მალხაზ გიქოშვილი.

შეგახსენებთ, რომ 19 ოქტომბერს „ნაციონალური მოძარობის“ ოფისებთან აქციები გამართეს და წარწერით "SOS, ლიკვიდირებულია" შესასვლელი კარი აჭედეს. 22 ოქტომბერს კი შეურაცხმყოფელი წარწერები მიაწერეს და წითელი საღებავებით შეღებეს "ერთიანი ნაციონალური მოძრაობის" რაიონულ ორგანიზაციების შენობები.

[თამარ თოთაძე, ახალციხე]