ახალციხეში ‘ნაციონალების’ საწინააღმდეგო აქციებზე საუბარს ‘საჭიროდ არ თვლიან’

რას ფიქრობენ გუშინ გამართულ აქციაზე, ხომ არ უკავშირდება მომხდარი NDI-ს კვლევებს, ვის მიერ იყო ორგანიზებული მათი აზრით და ემიჯნებიან თუ არა მომხდარს, – ხელმძღვანელი პირებისთვის ამ კითხვების დასასმელად „სამხრეთის კარიბჭემ“ სამცხე–ჯავახეთის სამხარეო –ადმინისტრაციის, ახალციხის მერიისა და ახალციხის მუნიციპალიტეტის გამგეობის საზოგადოებასთან ურთიერთობის სამსახურებს შუამდგომლობა სთხოვა.

სამცხე–ჯავახეთის სამხარეო ადმინისტრაციასა და ახალციხის მუნიციპალიტეტის გამგეობაში, განაცხადეს, რომ ამ თემაზე რაიმეს თქმის საჭიროებას ვერ ხედავენ.

„არ ვთვლით, რომ ეს აქციები მართული იყო და კომენტარის გაკეთების საჭიროებასაც ვერ ვხედავთ“, –გვითხრა სამცხე–ჯავახეთის სამხარეო ადმინისტრაციის საზოგადოებასთან ურთიერთობის სამსახურის წარმომადგენელმა ია გოგატიშვილმა.

იგივე პასუხი მივიღეთ ახალციხის გამგეობის საზოგადოებასთან ურთიერთობის სამსახურიდან: „არ ვთვლით საჭიროდ, რომ ამ თემაზე კომენტარი გავაკეთოთ“.

ახალციხის მერიაში ინეტერვიუს შესათანხმებლად დალოდება გვთხოვეს. „მერი შეხვედრაზეა, როცა გათავისუფლდება, შეგეხმიანებით“, – გვითხრა საზოგადოებასთან ურთიერთობის საკითხებში მთავარმა სპეციალისტმა სოფო მესხმა. 19:00 საათის მონაცემებით, „სამხრეთის კარიბჭე“ მერიას ჯერ ისევ ელოდება.

ერთადერთი, ვინც მომხდარი შეაფასა, ქალაქ ახალციხის საკრებულოს თავმჯდომარის მოვალეობის დროებითი შემსრულებელი თამარ გოგოლაძეა. მას პირდაპირ, შუამავლის გარეშე, ტელეფონით დავუკავშირდით.

„ყველა ადამიანს აქვს აზრის თავისუფალი გამოხატვის უფლება, იქ თუ რაიმე კანონდარღვევა არ იყო, მეტს ვერაფერს ვიტყვი. ნამდვილად არ ვიცი ვისი ორგანიზებით გაიმართა და ეს კითხვა არც არავისთვის დამისვამს“, – ამბობს თამარ გოგოლაძე და ამატებს, რომ ვინ იყვნენ აქციაზე, არ იცის, – „მედიის მიერ გამოქვეყნებულ ფოტოებს ვათვალიერებდი ჩემს თანამშრომლებთან ერთად და საერთოდ ვერავინ ვიცანი“.

შეგახსენებთ, გუშინ, 19 ოქტომბერს, "ერთიანი ნაციონალური მოძრაობის" ახალციხის რაიონულ ორგანიზაციასთან ტრანსფარანტებითა და შეძახილებით: „'SOS ლიკვიდირებული ენმ', 'გაქრით მწამებლებო', უნდა წავიდნენ საქრთველოდან ეს გარეწრები', 'ნაციონალებო გადაშენდით', 'გამოდით თქვე კურდღლებო', 'გაეთრიეთ აქედან', 'რუსთავი–2 –დამპალი მიშას მონები, 30–მდე მოქალაქემ აქცია გამართა. აქციის მონაწილეები შეძახილებით პარტიის წევრებს მიმართავდნენ, შემდეგ კი ოფისის შესასვლელი კარი აჭედეს, წარწერით: "SOS, ლიკვიდირებულია".

[თინათინ ზაზაძე, ახალციხე]