სამინისტრო: ‘მეხუთე სკოლაში მოსწავლეების შესაძლო ცემის ფაქტს დისციპლინური საბჭო შეისწავლის’

„ასეთ შემთხვევებში ვითარებას სკოლების დისციპლინური საბჭოები იხილავენ. საბჭო გადაწყვეტს რა მოხდება მასწავლებელთან მიმართებაშიც“, – ამბობენ განათლების სამინისტროს საზოგადოებასთან ურთიერთობის სამსახურში.

მათივე განცხადებით, საბჭოს გადაწყვეტილება ჯერ განათლების სამინისტროს ეცნობება და შემდეგ აღსრულდება: „თუ დადასტურდა, რომ ყველაფერი ისე მოხდა, როგორც დასკვნაში წერია, მაშინ ისე იქნება, მაგრამ, შესაძლოა სამინისტრომ სხვაგვარადაც ჩათვალოს საჭიროდ“.

შეგახსენებთ, ახალციხის მეხუთე საჯარო სკოლაში მათემატიკის მასწავლებელს ეთერ გვირჯიშვილს მეექვსე კლასის მოსწავლეების ცემაში ადანაშაულებენ. მასწავლებელი ამას კატეგორიულად უარყოფს. მას შემდეგ რაც მომხდარი „სამხრეთის კარიბჭემ“ გააშუქა, ახალციხის რაიონულმა სამმართველომ ცემის შესაძლო ფაქტზე, სსკ–ის 125–ე მუხლით ძიება დაიწყო.

[თამუნა უჩიძე, ახალციხე]