ადიგენში ახალგაზრდული ცენტრი გაიხსნა

ახალგაზრდული ცენტრი ადიგენში, არტემ ბალახაშვილის ქუჩაზე, საზეიმო ვითარებაში გაიხსნა. პროექტი ადგილობრივი თვითმმართველობისა და არასამთავრობო ორგანიზაცია „world vision- საქართველოს“ ერთობლივი ინიციატივით განხორციელდა.

შენობა, რომელიც ადიგენის მუნიციპალიტეტის ბალანსზეა, თვითმმართველობამ გაარემონტა, რისთვისაც ბიუჯეტიდან 22 ათასი ლარი გაიწერა, მისი ინვენტარით აღჭურვა კი „world vision- საქართველომ“ უზრუნველყო და ეს დაახლოებით 15 ათასი ლარი დაჯდა.

„ჩვენს თემში ბევრი პრობლემაა და მათ გადაწყვეტაში ახალგაზრდების ჩართულობა ძალიან მნიშვნელოვანია. სამი ძირითადი მიმართულება, რაზეც ვიმუშავებთ, უკვე გამოვყავით, ეს არის მოსახლეობის ცნობიერების ამაღლება, ახალგაზრდების ჩართულობა სასკოლო კლუბებში და ადგილობრივ თვითმმართველობასთან თანამშრომლობა“, – ამბობს ადიგენის ახალგაზრდული ცენტრის წარმომადგენელი რუსუდან მიქელაძე და ამატებს, რომ "world vision- საქართველოს" დახმარებით, ახალგაზრდებს უკვე სტრატეგიული დოკუმენტიც შემუშავებული აქვთ.

სამცხე–ჯავახეთის სამხარეო განვითარების პროგრამის მენეჯერი ნინო ლომიძე მიიჩნევს, რომ აღნიშნული ცენტრი არა ერთი პრობლემის მოგვარებას, არა მხოლოდ მუნიციპალურ, არამედ რეგიონის დონეზეც კი შეძლებს: „შესაძლოა დღეს ეს არის ძალიან მცირე წვლილი ახალგაზრდების განვითარებაში, მაგრამ გრძელვადიან პერსპექტივაში მისი როლი უფრო გაიზრდება. თუნდაც ადიგენიდან, რომელიც ყველაზე ღარიბი მუნიციპალიტეტია რეგიონში, იმის გამო რომ ელემენტარული ინფრასტრუქტურა არ არსებობს, ახალგაზრდები ტოვებენ მას, გარკვეულწილად ეს ცენტრი ადგილზე დააკავებს მათ“.

ადიგენის მუნიციპალიტეტის გამგებელი ზაქარია ენდელაძე პირობას დებს, რომ ახალგაზრდებთან აქტირუად ითანამშრომლებს. მისი თქმით, თვითმმართველობამ ახალგაზრდებთან ერთად დასუფთავების მიმართულებით ერთი პროექტი უკვე განახორციელა და მუნიციპალიტეტის მასშტაბით 30 ნაგვის ურნა დადგა: „ეს ამ ახალგაზრდების აქტიური მონაწილეობით გაკეთდა“.

ადიგენში განხორციელებულ პროექტს მიესალმება სპორტისა და ახალგაზრდულ საქმეთა სამინისტროს წარმომადგენელი ირაკლი ჟორჟოლიანი: „კარგი პრაქტიკაა, როცა სამთავრობო და არასამთავრობო ორგანიზაციების წარმომადგენლები ერთად ზრუნავენ თემის გაძლიერებისათვის. პრობლემების მოგვარება საკუთარი სივრციდან იწყება, სახლიდან იწყება“.

ახალგაზრდული ცენტრი ადიგენში ყოველდღე იმუშავებს, ხარჯებს ადიგენის მუნიციპალიტეტის გამგეობა დაფარავს. თვითმმართველობა პირველი ნოემბრიდან აქ კოორდინატორად მერაბ გორგოძეს დანიშნავს.

"world vision- საქართველო“ ამ დროისთვის რეგიონის მასშტაბით 18 თემში მუშაობს და 250 ახალგაზრდას აერთიანებს.





[თამუნა უჩიძე, ადიგენი]