ახალგაზრდული ფორუმი - მიღწევები და გამოწვევები

ახალციხის მუნიციპალიტეტის მერმა, ფორუმის დასაწყისში, ახალგაზრდების ჩართულობის პრიორიტეტულობაზე ისაუბრა.

სამცხე–ჯავახეთის სამხარეო ადმინისტრაციის ხელმძღვანელმა ბესიკ ამირანაშვილმა, მზაობა გამოთქვა, პირადად მიიღოს მონაწილეობა ყველა დაგეგმილ აქტივობაში. მან, ასევე, მიმართა მუნიციპალიტეტების მაღალჩინოსნებს: „მინდა მოვუწოდო მუნიციპალიტეტების მერებს, მოადგილეებს, მაქსიმალურად ითანამშრომლონ ახალგაზრდებთან და მხარი დაუჭირონ ახალგაზრდული ორგანიზაციების ფორმირებას და იზრუნონ ინფრასტრუქტურის მოწყობაზე, რაც ხელს შეუწყობს ახალგაზრდების სწორ განვითარებას, რომ მომავალში ისინი სრულფასოვანი წევრები იყვნენ ჩვენი საზოგადოების“, - განაცხადა ბესიკ ამირანაშვილმა

ფორუმზე მუნიციპალიტეტის მერიამ და არასამთავრობო ორგანიზაცია World Vision–ის წარმომადგენლება ახალგაზრდული საქმიანობის პრეზენტაცია გამართეს, სადაც ახალგაზრდული კუთხით მუნიციპალიტეტში არსებულ მიღწევებსა და გამოწვევებზე გააკეთეს აქცენტი.

World vision საქართველოს პროექტის – „კომპეტენციები დასაქმებისთვის“ – კოორდინატორმა, ირაკლი გიობელიძემ ფორუმის მთავარ მიზანზე ისაუბრა: „სწორედ ამას ემსახურება ჩვენი ფორუმი, რომ ის სუბიექტები, ვინც არიან ახალგაზრდული პოლიტიკის მიმართულებით ჩართული, ვიცნობდეთ ერთმანეთს, ვიცოდეთ ვინ რას აკეთებს, რა გეგმები აქვს მომავალი წლისთვის, რომ შემდეგ ერთად განვიხილოთ“.

ფორუმს, ასევე, ესწრებოდნენ ახლად შექმნილი ახალგაზრდობის სააგენტოს წარმომადგენლები, რომლებმაც დამსწრეებს თავიანთი მომავალი სამოქმედო გეგმა გააცნეს.

სააგენტოს ხელმძღვანელმა რეზო ჩარკვიანმა ხაზი გაუსვა არაფორმალური განათლების მნიშვნელობას ახალგაზრდულ საქმიანობაში და, ასევე, დაანონსა ახალგაზრდული საქმიანობის სტრატეგიული დოკუმენტის შექმნა. „ეს იქნება ახალგაზრდობის სააგენტოს მთავარი სახელმძღვანელო“, - აღნიშნა რეზო ჩარკვიანმა.

ფორუმი ახალციხის მუნიციპალიტეტის მერიისა და World Vision საქართველოს თანამშრომლობით გაიმართა.



[რობი ზარიძე, ახალციხე]