'მასწავლებელი და საზოგადოება'– საჯარო ლექცია ახალციხეში

შეხვედრა სამცხე–ჯავახეთის უნივერსიტეტის პირველ კორპუსში 11:00 საათზე დაიწყო. უნივერსიტეტის ადმინისტრაციას ლექციაზე ის პედაგოგები ჰყავდა მიწვეული, რომლებმაც სამცხე–ჯავახეთის უნივერსიტეტი დაამთავრეს და წარმატებული კარიერა აქვთ.

საჯარო ლექცია კითხვა–პასუხის რეჟიმში მიმდინარეობდა. მიწვეულმა პედაგოგებმა უნივერსიტეტში გატარებული წლები გაიხსენეს და იმ მნიშვნელობებზე ისაუბრეს, რომლებიც წარმატების მიღწევაში დაეხმარათ.

„ბედნიერი ვარ, რომ აქ ვიმყოფები სტუმრის სტატუსით. ჩემს ლექტორებს და მომავალ პედაგოგებს ვულოცავ მასწავლებლის დღეს. რაც შეეხება საზოგადოების დამოკიდებულებას მასწავლებლის მიმართ, ვფიქრობ, რომ დღეს უფრო ამაღლებულია, ვიდრე წლების წინ“,– ამბობს ახალციხის მეხუთე საჯარო სკოლის დირექტორი ინგა ვარდიძე.

შეხვედრაზე ახალბედა პედაგოგი მირანდა წინწკალაძეც ჰყავდათ მიწვეული, რომელმაც უნივერსიტეტის დამთავრების შემდეგ პირველად, სკოლის კარი, პედაგოგის რანგში შეაღო: „როდესაც სატუდენტი ვიყავი, ვამბობდი სხვადასხვა საგნებზე, რომ ამის სწავლა არ გვჭირდებოდა, მაგრამ პირიქით, ყველაფერი უნდა ისწავლო, აქ მიღებული ცოდნა აუცილებლად გამოგადგება“.

„ძალიან ბედნიერი ვარ, დღეს ჩემი სტუდენტებით არის გადატენილი ეკლესია–მონასტრები, სკოლები და მთელი საქართველო. ეს იმას ნიშნავს, რომ მე ტყუილად არ მიშრომია“, – განაცხადა პროფესორმა ნათელა ბერიძემ.

საჯარო ლექცია სამცხე–ჯავახეთის უნივერსიტეტის ჰუმანიტარულ და სოციალურ მეცნიერებათა ფაკულტეტის დეკანს გულიკო ბექაურს მიჰყავდა. ლექციის დასრულების შემდეგ, მიწვეულ პედაგოგებს უნივერსიტეტმა სიმბოლური საჩუქრები გადასცა.



[ვარლამ წიკლაური, ახალციხე]