სამცხე–ჯავახეთის უნივერსიტეტში კურსდამთავრებულთა ცერემონია გაიმართა

უნივერსიტეტის დასრულება მანტიებით სამცხე–ჯავახეთის სახელმწიფო უნივერსიტეტში წელს პირველად აღინიშნა. საზეიმო ღონისძიებას ბაკალავრიატისა და მაგისტრატურის 250 სტუდენტი დაესწრო.

„კურსდამთავრებულებს წარმატებებს და წინსვლას ვუსურვებ. მინდა, რომ მათ, ბედნიერი ქვეყანა შეექმნათ, ისეთი ქვეყანა, როგორიც ჩვენ და მათ სურთ. თუ მოვინდომებთ, ყველაფერი კარგად იქნება“, – განაცხადა სამცხე–ჯავახეთის სახელმწიფო უნივერისიტეტის რექტორმა მერაბ ბერიძემ.

მისი თქმით, წელს სტუდენტებმა სწავლა განსხვავებულ ამპლუაში, მანტია მოსხმულებმა დაასრულეს. ეს დღე ისტორიულია და არცერთ სტუდენტს არ დაავიწყდება.

„ბედნიერი ვარ, მინდა, რომ ყველამ გამოცადოს ის ბედნიერება, როგორიცა ამ მანტიით სწავლის დასრულება“, – ამბობს კურსდამთავრებული მანანა კოხოძე.

მანტიებით სწავლის დასრულების იდეა, უნივერსიტეტის ლექტორს, სტუდენტთა კარიერული ზრდისა და განვითარების ცენტრის ხელმძღვანელს, მერი სახამბერიძეს ეკუთვნის. როგორც თვითონ ამბობს, სწავლის დასრულებას მანტიით საფუძველი დღეს ჩაეყარა და მომავალშიც გაგრძელდება: „ეს ტრადიციად იქცევა და სამცხე–ჯავახეთის უნივერისტეტის ყველა სტუდნეტი სწავლას მანტია მოსხმული დაასრულებს“.

ღონისძიებას გამგეობისა და გუბერნიის წარმომადგენლები დაესწრნენ. მათ სტუდენტებს სწავლის დასრულება მიულოცეს და წარმატებები უსურვეს.

[ვარლამ წიკლაური, ახალციხე]