სამცხე–ჯავახეთის სახელმწიფო უნივერსიტეტში საჯარო ლექცია გაიმართა

საჯარო ლექცია სამცხე–ჯავახეთის სახელმწიფო უნივერსიტეტში გაიმართა, რომელსაც პროფესორ–მასწავლებლები და სტუდენტები ესწრებოდნენ. უნივერსიტეტის აუდიტორიაში შეკრებილმა საზოგადოებამ ილიას სახელმწიფო უნივერსიტეტის პროფესორებისგან საჯარო ლექცია მოისმინეს თემებზე: "სოკრატე ანტიკურობის განმანათლებელი" და "ერი, როგორც წარმოსახვითი ერთობა და კონსტრუქცია".

"თანამედროვე საზოგადოებას, როგორც ქართულს ისე ევროპულსაც, დრო და დრო სჭირდება გახსენება ორიენტირების, რა არის ზნეობრივი და სამართლებრივი ორიენტირები მართლა თავისუფალი საზოგადოების ჩამოყალიბებისთვის. ამ თვალსაზრისით ვიფიქრე, რომ სოკრატეს მაგალითზე შეიძლებოდა ამ პრინციპების ჩვენება, რაც ქმნის თანამედროვე ევროპულ საზოგადოებას", – ამბობს ილიას სახელმწიფო უნივერსიტეტის პროფესორი მამუკა ბერიაშვილი.

პროფესორი გიორგი მაისურაძის თქმით, აუდიტორიის მხრიდან უდიდესი ინტერესი იყო: "რაც დიდი საჩუქარია მათთვის, ვინც ლექციას კითხულობს"

მიმდინარე წლის მაისის თვეში ილიას და სამცხე–ჯავახეთის სახელმწიფო უნივერსიტეტებს შორის მემორანდუმი გაფორმდება.

"ვიდრე მემორანდუმს გავაფორმებდეთ, ჩვენ გარკვეული ტრადიცია გვაქვს ამ ტიპის სამეცნიერო კონტაქტების, რომ მემორანდუმი არ უნდა იყოს ფარატინა ქაღალდი და ის უნდა იყოს სერიოზული სამუშაო. ამიტომ შესავალი უკვე დაწყებულია და მაისში გავაფორმებთ მემორანდუმს", – ამბობს სამცხე–ჯავახეთის სახელმწიფო უნივერსიტეტის რექტორი მერაბ ბერიძე.

მისივე თქმით, მემორანდუმის გაფორმების შემდეგ, საჯარო ლექციებს სამცხე–ჯავახეთის სახელმწიფო უნივერსიტეტის პროფესორ–მასწავლებლები ილიას უნივერსიტეტში წაიკითხავენ. ასევე იქნება გაცვლითი პროგრამები სტუდენტებისთვის.



[თამარ თოთაძე, ახალციხე]