ენმ რაიონებში კორუფციული სქემების გახსნას გეგმავს – შეხვედრები სამცხე–ჯავახეთში

„ერთიანი ნაციონალური მოძრაობის“ ახალციხის, ასპინძისა და ადიგენის რაიონულ ორგანიზაციებში პარტიული შეხვედრები დღეს, 12 სექტემბერს იმართება. პარტიის აღმასრულებელი მდივანი სერგო რატიანი, პარტიის სხვა წევრებთან ერთად ჯერ ასპინძის, შემდეგ კი ახალციხის რაიონულ ორგანიზაციას ესტუმრა. ახალციხის შემდეგ კი შეხვედრა ადიგენში გაიმართება. სერგო რატიანის განმარტებით, შეხვედრების მიზანი ადგილობრივი აქტივისტებისა და რეგიონში არსებული ვითარების გაცნობაა.

„ახალციხე არის ერთ–ერთი მნიშვნელოვანი რაიონი. ვხედავ, რომ ძალიან გააქტიურებულია ჩვენი ორგანიზაცია. დღეს დავგეგმეთ სხვადასხვა აქტივობა. რამდენიმე სფეროა, სადაც ვიმუშავებთ, ეს არის კორუფციული სქემების მოძიება და გახსნა, ასევე სოციალურად დაუცველი მოსახლეობის საკითხი“, – ამბობს სერგო რატიანი.

შეხვედრებს ახალციხის, ასპინძისა და ადიგენის მაჟორიტარი დეპუტატები, რაიონული ორგანიზაციების წარმომადგენლები და პარტიის აქტივისტები ესწრებიან. ადიგენის მუნიციპალიტეტის მაჟორიტარი დეპუტატის ზურაბ ჩილინგარაშვილის თქმით, შეხვედრაზე სამომავლო გეგმებზეც ისაუბრეს.

„დავსახეთ პატარ–პატარა გეგმები, როგორ უნდა ვიმუშაოთ, როგორ უნდა შევუშალოთ ხელი ამ მთავრობას სახელმწიფოს ნგრევაში და ასე შემდეგ. ყველა საკრებულოში გვყავს ჩვენი ფრაქციები, პირველ რიგში მათ უნდა იმუშაონ ისე, რომ გარეთ გამოიტანონ ის უკანონო გადაწყვეტილებები, რომლებსაც მუნიციპალიტეტები იღებენ, საბოლოოდ კი არაფერი არ ხდება და სახელმწიფოდან გამოყოფილი თანხები ნათესავებისა და აქტივისტების ჯიბეებში ნაწილდება. საერთოდ, ამ ბოლო წლების განმავლობაში სამცხე–ჯავახეთში არაფერი კეთდება“, – ამბობს ზურაბ ჩილინგარაშვილი.

დავით დარჩიაშვილის თქმით, ამ ეტაპზე ძალიან მნიშვნელოვანია ბრძოლა საკონსტიტუციო ცვლილებებისთვის. პარტიაში ფიქრობენ, რომ საარჩევნო სისტემა უნდა შეიცვალოს არა 2020 წელს, არამედ 2016 წელს.

„უმრავლესობას ეს არ უნდა და ჩვენ უნდა ვიბრძოლოთ“, – ამბობს დარჩიაშვილი და ამატებს, – „ადამიანები კარგავენ მომავლის იმედს, ხედავენ, რომ მთელი ის დაპირებები, რაც იყო და რაზეც ჩვენ ვამბობდით, რომ ეს იყო ტყუილი, მართლაც ტყუილი აღმოჩნდა. მაგრამ რა არის მომავალი, ალტერნატივა, ამაზე ჩვენ ჩვენი გეგმა, ჩვენი სამუშაო გვაქვს და იმედი გვაქვს, რომ საზოგადოება დაგვიჯერებს“.

[თამარ თოთაძე, ახალციხე]