„გაერთიანებული დემოკრატიული მოძრაობა“ ვადამდელი საპარლამენტო არჩევნებისთვის ემზადება

„გაერთიანებული დემოკრატიული მოძრაობის“ წევრებმა სამუშაო შეხვედრა, 18 დეკემბერს ახალციხის ციხის ტერიტორიაზე გამართეს. დახურულ შეხვედრას სამცხე–ჯავახეთის რეგიონის ყველა მუნიციპალიტეტიდან ესწრებოდნენ. შეხვედრაზე იმყოფებოდნენ პოლიტიკური საბჭოს წევრებიც.

„ვემზადებით ვადამდელი საპარლამენტო არჩევნებისთვის.მოვუწოდებთ უმოქმედო და უნიათო ხელისუფლებას გადადგას ეს ნაბიჯი. ქვეყნის მასშტაბით ვხვდებით ჩვენს აქტივს და სტრატეგიას და ტაქტიკას ვაყალიბებთ. რა უნდა გავაკეთოთ და როგორ ვიყოთ უკეთ მომზადებული არჩევნებისთვის“, – ამბობს „გაერთიანებული დემოკრატიული მოძრაობის“ პოლიტიკური მდივანი გრიგოლ ბარამიძე.

მისივე თქმით, მათი პოლიტიკური პარტია ორგანიზაციულ, ფინანსურ და საკადრო ცვილებებს გეგმავს.

„ჩვენ უკვე გავხდით საარჩევნო სუბიექტი და გვაქვს დაფინანსება, რომელიც ოფიციალურად გამოიყოფა ბიუჯეტიდან. ჩვენ ვიმსჯელებთ როგორ უნდა გაიხარჯოს ფინანსები და როგორ უნდა ვიმუშაოთ არჩევნების წინ“, – ამბობს იგი.

როგორც პარტიის წევრები განმარტავენ, მომავალი წლიდან ყველა მუნიციპალიტეტში გაიხსნება შტაბები.

„გვაინტერესებს საერთო ფონი რეგიონში. რა ხდება რაიონებში როგორი ვითარებაა. ხალხი უკმაყოფილოა, ის დაპირებები, რომლებიც ხელისუფლებას ჰქონდა არაფერი შეასრულეს და მოსახლეობა მოატყუეს“, – ამბობს „ნინო ბურჯანაძე - გაერთიანებული დემოკრატიული მოძრაობა“ სამცხე–ჯავახეთის რეგიონის კოორდინატორი ჯიმშერ გოგოლაური.



[თინათინ ზაზაძე, ახალციხე]