დავით ბაქრაძე ‘მოძრავ შტაბთან’ ერთად სამცხე–ჯავახეთში შეხვედრებს მართავს

დღეს, 31 აგვისტოს „მოძრავი შტაბი“ ადიგენის მუნიციპალიტეტის სოფლებს ესტუმრა. პარტიის ლიდერებმა და მხარდამჭერებმა ადგილობრივებთან საარჩევნო პროგრამის შესახებ ისაუბრეს, ასევე, მათ პრობლემებს გაეცნენ.

როგორც „ევროპული საქართველოს“ ადიგენის რაიონული ორგანიზაციის თავმჯდომარე სიმონ პარუნაშვილი ამბობს, სოფლებში მოსახლეობის უმრავლესობა უმუშევრობაზე, მცირე პენსიასა და მაღალმთიანი დასახლების სტატუსის არქონაზე ჩივის: „ეს შეხვედრები სპონტანურია, წინასწარ არ არის მოსახლეობა შეკრებილი. დავდივართ ყველა ერთად, ავტობუსით. დღეს ვიყავით აბასთუმანში, სოფელ აბასთუმანში, ვარხანში, არალში, უდეში და ახლაც ვმოძრაობთ. ხალხს გზადაგზა ვხვდებით“.

„მოძრავი შტაბი“ უკვე იყო ახალციხის სოფლებში, ხვალ, 1 სექტემბერს კი შტაბის ავტობუსი ასპინძის სოფლებს გაივლის.
წინასაარჩევნო კამპანიის ფარგლებში, „ევროპული საქართველოს“ მოძრავმა შტაბმა ტურნე ერთი თვის წინ, კახეთიდან დაიწყო. მათი ინფორმაციით, შტაბი ყველა რეგიონში ჩავა.

[თაკო ფეიქრიშვილი, ადიგენი]