'ქართული ოცნების' დახურული შეხვედრა ახალციხეში [Photo/Video]

„ქართული ოცნების“ პარტიის ადგილობრივ წევრებთან შესახვედრად დღეს, 11 სექტემბერს ახალციხეში დიმიტრი ლეჟავა, პაატა გიორგიძე და კახა სამხარაძე ჩამოვიდნენ. შეხვედრა პარტიის ყოფილი შტაბის შენობაში შედგა და ის მედიისთვის დახურული იყო.

„ქართული ოცნების“ შტაბი შეხვედრის დასრულებამდე დატოვა ახალციხის მერობის ყოფილმა კანდიდატმა, ძალოვან ვეტერანთა და პატრიოტთა პოლიტიკური მოძრაობის წევრმა გოჩა ათოშვილმა.

მისი თქმით, შეხვედრაზე იმის გაჟღერება სურდა, რომ დღეს პარტია „ქართული ოცნება“ ახალციხეში ორადაა გაყოფილი, ე.წ. პირველ ნაწილში ის ადამიანები არიან, ვინც 2012–ში იბრძოდა და ზეწოლებს უძლებდა, მეორეში კი ისინი, ვისაც დღეს ადგილობრივი ხელისუფლება აბარიათ.

„მინდოდა ჩემი პოზიცია დამეფიქსირებინა, რომ ძალიან მინდოდა ამ პარტიაში ყოფნა, მაგრამ იმ პიროვნებების გვერდით ყოფნა, რომლებიც დღეს ადგილობრივ თვითმმართველობაში მოვიდნენ, ჩემთვის მიუღებელია, – ამბობს გოჩა ათოშვილი და ამატებს, რომ ამის თქმა არ დასცალდა, რადგან პარტიის წარმომადგენლებმა თავიდანვე განმარტეს, რომ ვინც „ოცნების“ წევრი“ არ იყო, სხდომა დაეტოვებინა, – აღარ მივეცი თავს უფლება ეს მეთქვა და გამოვედი“.

ათოშვილის შემდეგ შეხვედრიდან გამოვიდა „ახალციხის ციხის“ ყოფილი დირექტორი ელგუჯა ბიჭაშვილი. მისი თქმით, „ის დაპირისპირება და დაძაბულობა, რაც დღეს პარტიაში და ახალციხეშია, სუს–ის ყოფილი უფროსის დავით ლომიძისა და ახალციხის გუბერნატორის აკაკი მაჭუტაძის ბრალია“.

ასევე სხდომის დასრულებამდე დატოვა შტაბი პარტიის ერთ–ერთმა აქტივისტმა რევაზ გოგოლაძემ. როგორც მან განაცხადა, მის მეღულეს, ახალციხის მერიის ყოფილ თანამშრომელს ნანა გელაშვილს ქალაქის მერთან შელაპარაკება მოუხდა.

სხდომის დასრულების შემდეგ კი თავად ნანა გელაშვილმა განმარტა: „ვთქვი, რომ განცხადება იძულებით დამაწერინეს და სამსახური დამატოვებინეს. ამას მოჰყვა ხმაური, დაპირისპირება არ ყოფილა“.

გელაშვილის განცხადებით, მან ასევე გამოთქვა გულისტიკივილი იმის შესახებ, რომ არც მას და არც პარტიის იმ წევრებს, რომლებიც მასთან ერთად 2012 წელს იბრძოდნენ, შეხვედრის შესახებ არ შეატყობინეს.

ვინ უწევდა შეხვედრას ორგანიზებას და რის მიხედვით მიიწვიეს პარტიის აქტივისტები, ამის შესახებ კომენტარის გაკეთება არავინ ისურვა. შეხვედრის დასრულების შემდეგ არც იქ განხილული საკითხების დეტალებზე ისაუბრეს.

ახალციხის მუნიციპალიტეტის ყოფილმა გამგებელმა ბესიკ ბლიაძემ შეკითხვაზე, იყო თუ არა მიწვეული შეხვედრაზე და საიდან შეიტყო დღევანდელი შეკრების შესახებ, გვიპასუხა: „თბილისიდან გავიგე“.

დიმიტრი ლეჟავამ კი განაცხადა, რომ დასწრება პარტიის წევრებისთვის თავისუფალი იყო და ვისაც სურდა დაესწრებოდა.
ხვალ ახალცხიეში პარტიის ლიდერს კახი კალაძეს ელოდებიან. დაუზუსტებელი ინფორმაციით, მასთან შეხვედრაც დახურული იქნება.



[თამუნა უჩიძე, ახალციხე]