ახალციხეში „ქართული ოცნების“ შიდაპარტიული შეხვედრა მიმდინარეობს

“ბონა დეაში“ შეხვედრა 16:00 საათზე დაიწყო. შეხვედრის დაწყებამდე ნახევარი საათით ადრე დაიწყეს სასტუმროში შეკრება პარტიის წევრებმა. რეგიონის თითო მუნიციპალიტეტიდან შეხვედრას 22 ადამიანი ესწრება.

მუნიციპალიტეტიდან ჩამოსულ აქტივისტებს ახალციხეში გამგებლები ხვდებოდნენ. მათ თან ჰქონდათ შეხვედრაზე დამსწრეთა სიები. დარბაზში ხალხს ამ სიების შესაბამისად უშვებდნენ.

შეხვედრაზე რეგიონის ყველა მუნიციპალიტეტის პირველი პირი, სამსახურების უფროსები, თვითმმართელობებს დაქვემდებარებული ააიპ–ებისა და შპს–ების უფროსები ესწრებიან. ასევე, შეხვედრაზე იმყოფებიან პარტიის სხვა აქტივისტები.

პარტიის წევრებს „ქართული ოცნება – დემოკრატიული საქართველოს“ აღმასრულებელი მდივანი ირაკლი კობახიძე და პარტიის სხვა ხელმძღვანელი თანამდებობის პირები ხვდებიან.

შეხვედრა მედიისთვის დახურულია. ჟურნალისტებს მხოლოდ შეხვედრის დაწყებამდე კადრების აღების უფლება მისცეს.

„შეხვედრაზე განხილული იქნება სამცხე–ჯავახეთის მუნიციპალიტეტებში არსებული ვითარება და პარტიის წინაშე მდგარი გამოწვევები. პარტიის ხელმძღვანელობა აქტივს გააცნობს ინფორმაციას პარტიაში მიდინარე ცვლილებების შესახებ. ამასთან, განსაკუთრებული ყურადღება დაეთმობა საოლქო ორგანიზაციების გაძლიერების გეგმას, რომელიც შემუშავებულ იქნა პარტიის ცენტრალური ოფისის მიერ და რომლის განხორციელება მიმდინარე წლის ოქტომბრიდან დაიწყება“, – ვკითხულობთ პრესრელიზში.



[ვარლამ წიკლაური, ახალციხე]