ახალციხეში, ‘ქართული ოცნების’ შტაბში, პარტიის წევრები იკრიბებიან

შტაბში შედის ახალციხის მუნიციპალიტეტის გამგებელი ზაზა მელიქიძე

პარტიის ყოფილი შტაბის შენობაში შეკრება 15:30 საათიდან დაიწყეს. ამ წუთებში შტაბში, სხდომათა დარბაზში შეკრებილი არიან ახალციხის მერიისა და გამგეობის წარმომადგენლები: მერი, გამგებელი, სამსახურების, ადმინისტრაციების, თვითმმართველობას დაქვემდებარებული შპს–ებისა და ააიპ–ების უფროსები.

ასევე, შტაბში მივიდნენ „ქართული ოცნების“ წევრები, ადგილობრივი ხელისუფლების ყოფილი თანამშრომლები, ახალციხის მუნიციპალიტეტის ყოფილი გამგებელი ბესიკ ბლიაძე, ახალციხის ციხის ყოფილი უფროსი ელგუჯა ბიჭაშვილი და სკოლამდელი აღზრდის დაწესებულებათა გაერთიანების ყოფილი უფროსი ნანა გელაშვილი. შტაბში იმყოფებიან პარტიის სხვა აქტივისტებიც, რომლებიც ამ ეტაპზე რაიმე პოზიციაზე დასაქმებული არ არიან.

პარტიის ახალციხის ორგანიზაციის ხელმძღვანელმა, ახალციხის მერმა გიორგი კოპაძემ „სამხრეთის კარიბჭეს“ განუცხადა, რომ შტაბში პარტიის ლიდერებს ელოდებიან, შეხვედრა დახურულია და ჟურნალისტს დასწრების უფლებას არ მისცემენ.

კითხვაზე, რა საკითხებზე იმსჯელებენ დახურულ შეხვედრაზე, გიორგი კოპაძემ განაცხადა, რომ ეს ჯერ ცნობილი არ არის.
„სამხრეთის კაარიბჭეს“ დარბაზში გამოჩენას შეკრებილთა გაღიზიანება მოჰყვა. „თქვენ ვიღამ გაგაგებინათ, რომ შეხვედრაა“ – გაისმა დარბაზიდან რეპლიკა.





[sknews.ge]