ნინოწმინდის მუნიციპალიტეტში გზების რეაბილიტაცია მიმდინარეობს

ნინოწმინდის მუნიციპალიტეტის სოფლებში საგზაო ინფრასტრუქტურის მოწესრიგება მიმდინარეობს. უკვე დასრულებულია საავტომობილო გზის მშენებლობა სოფელ განძაში. ასევე სოფლებში ეშტიასა და სათხეში მიმდინარეობს ტროტუარების მოწყობა და იგება ასფალტ–ბეტონის საფარი.

სამცხე–ჯავახეთის სამხარეო ადმინისტრაციაში განმარტავენ, რომ აღნიშნულ სოფლებში არსებულ გზებს რეაბილიტაცია რამდენიმე ათწლეულია არ ჩატარებია. სამუშაოების დასრულების შემდეგ მოსახლეობისათვის განახლებული გზით გადაადგილება და რაიონულ ცენტრთან დაკავშირება გაცილებით მარტივი და კომფორტული იქნება.

პროექტი, რომელიც რეგიონში განსახორციელებელი პროექტების ფონდიდან 1 488 000 ლარით დაფინანსდა სექტემბრის ბოლოს დასრულდება და ჯამში ასფალტ-ბეტონის საფარი გზის 4 კილომეტრიან მონაკვეთზე დაიგება.

ნინოწმინდის მუნიციპალიტეტში მიმდინარე სამუშაოები მხარის გუბერნატორმა აკაკი მაჭუტაძემ, ადგილობრივი თვითმმართველობისა და სამშენებლო კომპანია შპს „ჯავახ-ავტოგზის“ წარმომადგენლებთან ერთად მოინახულა.



[sknews.ge]