ახალციხის მუნიციპალიტეტის სოფლებში გზების რეაბილიტაცია გრძელდება ®

ასფალტის საფარი იგება სოფელ ხეოთთან დამაკავშირებელი საავტომობილო გზის 2300 მეტრიან მონაკვეთზე. აღსანიშნავია, რომ სოფელი ხეოთი მაღალმთიანი სტატუსის მქონე დასახლებაა, სადაც განსაკუთრებით ზამთრის პერიოდსა და უამინდობისას მოსახლეობას გადაადგილება უჭირდა, სამუშაოების დასრულების შემდეგ კი ადგილობრივები კეთილმოწყობილი გზით ისარგებლებენ.



სანიაღვრე არხები ეწყობა და ბეტონის საფარი იგება გზის 1200 მეტრიან მონაკვეთზე სოფელ ნაოხრებში, სადაც სარეაბილიტაციო სამუშაოების დასრულების შემდეგ სოფლის მაცხოვრებლები კეთილმოწყობილი გზით შეძლებენ ადმინისტრაციულ ცენტრთან დაკავშირებას.

ორივე პროექტი რეგიონებში განსახორციელებელი პროექტების ფონდიდან და ადგილობრივი ბიუჯეტიდან ფინანსდება. სოფლებამდე მისასვლელი გზების კეთილმოწყობა და მოწესრიგება, ახალციხის მუნიციპალიტეტში ერთ-ერთი მთავარი პრიორიტეტია, სადაც ამ დროისთვის ექვსი მასშტაბური საგზაო ინფრასტრუქტურული პროექტი მიმდინარეობს.