სკოლამდელი აღზრდის დაწესებულებათა გაერთიანების ყოფილმა ხელმძღვანელმა და ასევე, ინფრასტრუქტურის სამსახურის ყოფილმა სპეციალისტმა, ნანა გელაშვილმა სამცხე–ჯავახეთის სამხარეო პროკურორს ლევან პაქსაშვილს სარჩელით დღეს, 26 აგვისტოს მიმართა.
სარჩელში ნანა გელაშვილი წერს, რომ 2013 წლის 1 თებერვლიდან სკოლამდელი აღზრდის დაწესებულებათა გაერთიანების ხელმძღვანელად მუშობდა, ადგილობრივი თვითმმართველობის არჩევნების შემდეგ კი
სამსახურიდან წასვლის თაობაზე განცხადება დააწერინეს, თუმცა, დაპირდნენ, რომ როგორც მრავალშვილიან დედას, აუცილებლად დაასაქმებდნენ. სანაცვლოდ მისგან ითხოვდნენ, რომ არ ეჩივლა.
სარჩელის მიხედვით, 2014 წლის 9 სექტემბრიდან, არაერთი ზარის შემდეგ, ნანა გელაშვილი ახალციხის მერიის ინფრასტრუქტურის სამსახურში მართლაც
დაასაქმეს.
იმ პერიოდში ახალციხის მერიაში საჯარო მოხელეთა შესარჩევი კონკურსი მიმდინარეობდა, გელაშვილს კონკურსში მონაწილეობა არ მიუღია, თუმცა, მუშაობა მას შემდეგაც გააგრძელა, როცა ახალი კადრები დაინიშნა.
„მთელი ამ პერიოდის განმავლობაში სისტემატური კონტაქტი მქონდა ქალაქის მერთან იმის თაობაზე, უნდა მევლო თუ არა სამსახურში. საქმის კურსში იყო მერიის ინფრასტრუქტურის სამსახურის უფროსი გელვასი გელაძე. 2015 წლის 11 თებერვალს, მერიის ადმინისტრაციის სამსახურის უფროსმა ნინო მიქაბერიძემ კაბინეტში დამიბარა და მითხრა:
პრესა შენით არის დაინტერესებული და ახლავე წადი სამსახურიდანო. 2015 წლის 5 იანვრიდან 11 თებერვლამდე არ დაწერეს ჩემი დანიშვნის ბრძანება და თავისთავად, ხელფასიც არ ამიღია. თუმცა, 11 თებერვალს ჩემი ხელმოწერაა დაფიქსირებული დოკუმენტაციაზე. ჩემთვის უცნობია, ამ პერიოდის განმავლობაში ვითვლებოდი თუ არა თანამშრომლად, თუ ვიყავი თანამშრომელი, რატომ არ მომცეს ხელფასი და თუ არ ვიყავი მერიის თანამშრომელი, რატომ მამუშავებდნენ და მაწერინებდნენ ხელს შემოსულ წერილებზე“, – ვკითხულობთ სარჩელში.
ნანა გელაშვილი ამბობს, რომ ქალაქის მერმა გიორგი კოპაძემ, სამსახურიდან გათავისუფლების შემდეგ მისი მეუღლე მერიაში დაიბარა და უთხრა: „ნანა გაჩუმდეს, რამე სამსახურს მივცემთ და მაგ ხელფასსაც პრემიის სახით დავურიცხავთო“.
მისივე თქმით, მერი დროს წელავდა, რადგან გელაშვილს შესაბამისი ორგანოსთვის არ მიემართა: „ამბობდა, რომ ტბაზე ააიპ–ი შეიქმნებოდა და იქ დამაწყებინებდა მუშაობას, თუმცა უშედეგოდ. დირექტორობას არ ვითხოვდი, სამსახური მინოდა იმისთვის, რომ ოთხი შვილი მერჩინა“.
ახალციხის მერიაში ნანა გელაშვილის საქმესთან დაკავშირებით კომენტარზე უარს აცხადებენ. "სანამ არ შემოვა პროკურატურიდან წერილი, ამ საქმეზე კომენტარს არ გავაკეთებთ. ვიღაცა რაღაცას ჭორაობს და გვაბრალებს, ამაზე კომენტარს ვერ გავაკეთებთ", – გვითხრეს პრესსამსახურში.
ნანა გელაშვილის საქმეზე "სამხრეთის კარიბჭეს" არაერთი მასალა აქვს მომზადებული, მათი ნაწილიც ასევე მერის კომენტარის გარეშეა. ერთ–ერთ მასალაში კი გიორგი კოპაძე უარყოფს გელაშვილისთვის რაიმე დაპირებას და
აცხადებს, რომ მან არც გელაშვილის სამსახურში სიარულის შესახებ იცოდა რამე.
ნანა გელაშვილს იმედი აქვს, რომ პროკურატურა საქმეს შეისწავლის და ყველა ის დარღვევა გამოვლინდება, რაც მისი მუშაობის დროს ხდებოდა. ახალციხის მერს კი მაშინ მაინც მოუწევს ყველა კითხვაზე პასუხის გაცემა. ასევე, გელაშვილი იმედოვნებს, რომ ერთი თვის სახელფასო დავალიანებაც აუნაზღაურდება.
[ვარლამ წიკლაური, ახალციხე]