სამცხე–ჯავახეთში ბავშვებში გულის დაავადებების მაღალი მაჩვენებელია

ახალციხის რაიონულ ჰოსპიტალში გამოკვლევები დღეს დილის 11:00 საათიდან დაიწყო და 18:00 საათამდე გაგრძელდა. მთელი დღის განმავლობაში საავადმყოფოს ეზო ხალხით იყო სავსე. პაციენტები გასასინჯად რეგიონის სხვადასხვა მუნიციპალიტეტებიდან იყვნენ ჩამოსული. ზოგი მათგანი წინასწარ იყო ჩაწერილი, თუმცა, რიგში დგომა მაინც უწევდათ.

„სამ საათზე ვიყავი ჩაწერილი, მაგრამ იმდენი ხალხია ცოცხალ რიგში მოგვიწია დადგომა. ადიგენიდან ჩამოვედი, ბავშვს ადრე გულის სარქველზე პრობლემა ჰქონდა და შემოწმების მიზნით მოვედით“, – გვითხრა ადიგენის მუნიციპალიტეტეში მცხოვრებმა ერთ–ერთმა მოქალაქემ.

პაციენტებს იაშვილის სახელობის ბავშვთა საავადმყოფოს კარდიოლოგები სინჯავდნენ. „სამედიცინო კორპორაცია ევექსის“ დედათა და ბავშვთა სამსახურის დირექტორი დავით ციბაძე ამბობს, რომ მიმართვიანობა ძალიან მაღალი იყო: „რომ გადავხედოთ სხვა რეგიონებს, მაგალითად თელავს, ზუგდიდს, ასევე ქუთაისს, მათთან შედარებით ბათუმსა და ახალციხეში საკმაოდ მაღალი პროცენტი აღმოჩნდა გულით დაავადებული ბავშვების. ეს ნიშნავს, რომ ჩვენ ველოდებოდით მაგალითად, რომ გაგვესინჯა 20 ბავშვი, მაგრამ 40 ბავშვს აცდა დღეს გასინჯულთა რაოდენობა. მათგან დაახლოებით 15–17 პროცენტი აღმოჩნდა, რომლებსაც აქვთ გულის თანდაყოლილი ანომალია, რაც საკმაოდ მაღალი პროცენტია“.

მისივე თქმით, ეს არ ნიშნავს, რომ ყველა საოპერაციოა: „ზოგს შეიძლება კათეტერიზაცია დასჭირდეს, ზოგს არანაირი ჩარევა, მაგრამ აუცილებლად ბოლომდე უნდათ გამოკვლევები“.

დავით ცაბაძის თქმით, იაშვილის კლინიკაში იხსნება ბავშვთა კარდიოქირურგიული ცენტრი, სადაც ყოველთვიურად იტალიელი ქირურგები, რეანიმატოლოგები და კარდიოლოგები ჩაატარებენ უფასო ოპერაციებს: „შესაბამისად, იმ ბავშვები, რომლებიც ვერ ახერხებენ თბილისში ჩამოსვლას, ან არ იციან რომ შეიძლება გამოკვლევის შემდეგ რაღაცა დიაგნოზი დაუდგინდეთ, ვნახულობთ ადგილზე და საჭიროების შემთხვევაში ვუწევთ რეკომენდაციას, რომ გაესინჯონ ჩვენს იტალიელ კოლეგებს“.

როგორც დავით ციბაძე ამბობს, ძალიან რთულია იმის თქმა, რატომაა აჭარასა და სამცხე–ჯავახეთში გულის დაავადებების მაღალი რისკი: „ეს არის ორსულობის პირველ ტრიმესტრში განვითარებული პათოლოგია. როდესაც ორსულობა დაუგეგმავია, გვიან იგებენ, რომ ორსულად არიან და არ აქცევენ თავს ყურადღებას ისე, როგორც ფეხმძიმობის ცოდნის შემთხვევაში მიაქცევდნენ“.

მსგავსი კონსულტაციები „სამედიცინო კორპორაცია ევექსმა“ თელავში, ზუგდიდში, ქუთაისსა და ბათუმში ჩაატარა.

[თამარ თოთაძე, ახალციხე]