სამცხე-ჯავახეთში ჩიყვის მაღალი მაჩვენებელი დაფიქსირდა

რეგიონის მცხოვრებლებს ორი დღის განმავლობაში, 13-14 ივნისს, ენდოკრინოლოგიურ ცენტრ MG-ს ექიმები იკვლევდნენ. გამოკვლევა უფასო იყო. აქცია ახალციხის მუნიციპალიტეტის გამგეობის მხარდაჭერით განხორციელდა.

„მოსახლეობას პროფილაქტიკის მიზნით ჩაუტარდა გამოკვლევები. ამ რეგიონში საკმაოდ ბევრს აღმოაჩნდა ფარისებრი ჯირკვლის დაავადება“, – ამბობს ენდოკრინოლოგიურ ცენტრ MG-ის წარმომადგენელი.

ორი დღის განმავლობაში ექიმებმა 144 მოქალაქე გამოიკვლიეს.

„მოქალაქეების აქტივობა პირველ დღეს უფრო მაღალი იყო, 92 მოქალაქე მოვიდა. მეორე დღეს კი 52–მა ადამიანმა ჩაიტარა გამოკვლევა“,– ამბობს ახალციხის მუნციპალიტეტის გამგეობის კადრებისა და საქმის წარმოების სპეციალისტი თამუნა სამსონიძე.

ორდღიანი უფასო აქციის მიზანი შაქრიან დიაბეტისა და სხვა ენდოკრინული დაავადებების მქონე პირთა მონიტორინგი იყო. უფასო აქციით სარგებლობა ნებისმიერ დაინტერესებულ პირს შეეძლო.


[ნინო ზედგინიძე, ახალციხე]