სახალხო დამცველის მობილური ჯგუფები სამცხე–ჯავახეთში არჩევნებს დააკვირდებიან

პირველ ოქტომბერს, სახალხო დამცველის წარმომადგენელმა სამცხე-ჯავახეთის მხარეში სალომე ყულიჯანიშვილმა, ახალქალაქის ოფისში ადგილობრივი მედიისა და არჩევნების საკითხებზე მომუშავე არასამთავრობო სექტორის წარმომადგენლებისთვის შეხვედრა გამართა, სადაც საზოგადოებას საარჩევნო პერიოდში ადამიანის უფლებათა დარღვევის ფაქტების მონიტორინგის პროექტის შესახებ ინფორმაცია გააცნო.

პროექტის ფარგლებში სამცხე-ჯავახეთის რეგიონში იმუშავებს პროექტის კოორდინატორი, ორი სასამართლო მონიტორი და სამი მობილური ჯგუფი. სამუშაო არეალი იქნება: ახალციხე-ადიგენი, ასპინძა-ბორჯომი, ახალქალაქი-ნინოწმინდა.

მობილური ჯგუფები დააკვირდებიან წინასაარჩევნო და არჩევნების მიმდინარეობისას გამოვლენილ უფლებების დარღვევის ფაქტებს.
სასამართლო მონიტორები მონიტორინგს გაუწევენ და შეისწავლიან არჩევნებთან დაკავშირებული საჩივრების განხილვის პროცესს, როგორც საოლქო საარჩევნო კომისიებში, ასევე სასამართლოებში.

პროექტი დაფინანსებულია ფონდ ,,ღია საზოგადოება საქართველოს“ მიერ.

[sknews.ge]