ვის და რატომ გაახსენდნენ დუხობორები?

იდეა, ახალციხეში მცხოვრებ ჟურნალისტს გულო კოხოძეს ეკუთვნის. მისი ფინანსური მხარდამჭერი ‘ზაზა დარასელის ფონდია’.

„ტავრიელი დუხობორების დეპორტაცია საქართველოში და მათი იდენტობა“, - ასე ქვია პროექტს, რომლის განხორციელებაც ოფიციალურად 1 ივლისიდან დაიწყება. პროექტი ერთწლიანია.

პროექტის პრეზენტაცია, დღეს, 26 ივნისს, ‘ახალციხის დემოკრატიული ჩართულობის ცენტრში’ შედგა.

პროექტის ფარგლებში გაკეთდება ვებ-გვერდი, რომელზეც სისტემატურად განთავსდება ინფორმაციები დუხობორების ცხოვრებისა და ტრადიციების შესახებ. მომზადდება არამხოლოდ სტატიები, არამედ ფოტო და ვიდეო რეპორტაჟები. გადაიღებენ ერთ დოკუმენტურ ფილმსაც. ყოველ კვარტალში კი ერთი ინტერნეტ-ჟურნალი მომზადდება. ვებ-გვერდიც და ინტერნეტჟურნალებიც ქართულ და რუსულ ენებზე იქნება.

გულო კოხოძის თქმით, ვებ-გვერდი მიმდინარე წლის პირველი ივლისიდან ამოქმედდება.

გულო კოხოძე ჟურნალისტად წლებია მუშაობს. ამბობს, რომ
ამ ხნის განმავლობაში არაერთხელ აქვს მომზადებული სტატიები სამცხე-ჯავახეთში მცხოვრები დუხობორების შესახებ. იდეაც, სწორედ აქედან გაუჩნდა.

‘ამჟამად რეგიონში სულ 20 ოჯახია დარჩენილი. პროექტი კულტურულ მედიაზე გამოცხადდა და ვიფიქრე, რომ დუხობორების კულტურის გაცნობა საზოგადოებისთვის ძალიან საინტერესო იქნებოდა. ერთი წლის განმავლობაში გამუდმებით მომიწევს მათთან შეხვედრა და საუბარი. ბევრი მათგანი ძალიან ხანდაზმულია, შესაძლოა, ეს ვებ-გვერდი იყოს ის სივრცე, სადაც მათი უკანასკნელი ნააზრევი დაფიქსირდება. უამრავი მასალა არსებობს ინტერნეტ-სივრცეში მათ შესახებ, შევეცდები აქცენტი მათ ტრადიციებსა და კულტურაზე გავამახვილო’, - ამბობს პროექტის ავტორი.



[თამარ თოთაძე, ახალციხე]