თამარის ქანდაკებას რეაბილიტაცია სჭირდება

1999 წლის გაზაფხულზე ახალციხეში თამარ მეფის ძეგლი დაიდგა. მას შემდეგ 16 წელიწადი გავიდა. დღეს ახალციხელები წუხან, რომ ძეგლის პირვანდელი სახე შეილახა და ფიქრობენ, რომ ქანდაკებას რეაბილიტაცია სჭირდება.

„განახლება სჭირდება თამარ მეფის ძეგლს. ქანდაკება უკვე კარგა ხნისაა და რესტავრაცია სჭირდება, რათა უფრო კარგი სანახავი და მოსაწონი იყოს ტურისტებისთვის. ბევრი დამსვენებელი ჩამოდის და უკეთესი იქნება, თუ ძეგლს მეტი ყურადღება მიექცევა,“– ამბობს ახალციხის მცხოვრები ნათია ფერაძე.

ახალციხის მცხოვრებლები, ასევე, ამბობენ, რომ ძეგლს, გარემოს ზემოქმედებით, პირვანდელი ფერი დაკარგული აქვს, ხოლო ზოგიერთი დეტალი დაზიანებულია.

მელანო ცეცხლაძის თქმით, „კარგი იქნება, თუ ძეგლს რესტავრაციას ჩაუტარებენ და უფრო ლამაზი, მიმზიდველი გახდება.“

„ძეგლი მოუვლელია და ნამდვილად სჭირდება ყურადღება, მე როგორც შევამჩნიე, მოტეხილი აქვს ზოგი ნაწილი, მათ შორის - თითიც,“ –ამბობს ელენე ქიმერიძე.

ახალციხელთა საწუხარით მივმართეთ ახალციხის მერიას, სადაც გვითხრეს, რომ გეგმავენ ძეგლის რესტავრაციას, თუმცა, ამ დროისთვის კონკრეტული ინფორმაცია არ გააჩნიათ.

[sknews.ge]