ზარზმელის ქუჩას ბუნებრივი აირი არ მიეწოდება

როგორც ადგილობრივებმა „სამხრეთის კარიბჭესთან“ განაცხადეს, გაზი დაახლოებით 14:00 საათზე გაითიშა. ბუნებრივი აირის შეწყვეტის შესახებ კომპანიას აბონენტები არ გაუფრთხილებია.

ადგილობრივების სატელეფონო ზარები გაზის შეწყვეტის მიზეზის გასარკვევად, ახალციხის მერიაშიც შევიდა. მერიის პრესსამსახურის თანამშრომლის განმარტებით, მათთან არაერთმა მოქალაქემ დარეკა.

კომპანიაში, რომელიც ახალციხეს ბუნებრივი აირით ამარაგებს, ამბობენ, რომ დასახლებას ბუნებრივი არის მიწოდება ავარიის გამო შეუწყდა. დაზიანება ტექნიკურმა ჯგუფმა გარე მილებზე, ქუჩაში აღმოაჩინა. რაც შეეხება აბონენტების გაფრთხილებას, ავარიის შემთხვევებში მოსახლეობას ვერ აფრთხილებენ.

"სამუშაოები მიმდინარეობს. სხვა დანარჩენ ქუჩებს მიეწოდებათ. წინასწარ არ გაგვიფრთხილებია, რადგან ავარიული სიტუაცია იყო და ვერ გავაფრთხილებდით, ასეთ სიტუაციებში წინასწარ ვერ ვაფრთხილებთ. ქუჩაში დავინახეთ დაზიანება და დავიწყეთ გაკეთება" , – ამბობს კომპანიის დირექტორი ვასილ აბულაძე.

მისივე თქმით, დასახლებას გაზის მიწოდება დაახლოებით ორ საათში აღუდგება.

[თინათინ ზაზაძე, ახალციხე]