ახალციხეს ბუნებრივი აირი არ მიეწოდება

შპს „ინტერგაზის“ დირეტორის ვასილ აბულაძის განმარტებით, ახალციხეში გაზი ავარიულად დაახლოებით 13:00 საათისთვის გაითიშა.

მისივე განმარტებით, 9 აპრილის ქუჩაზე, გაზის მიწისქვეშა სადენი „ენერგო–პრო ჯორჯიას“ ახალციხის სერვისცენტრის თანამშრომლებმა შემთხვევით დააზიანეს, მაშინ, როდესაც ცხრასართულიან კორპუსში დენის მრიცხველებს ამონტაჟებდნენ.

„ენერგო–პრო ჯორჯიას“ სამხრეთ საქართველოს ფილიალის საზოგადოებასთან ურთიერთობის სამსახურის წარმომადგენელი გიორგი ბალახაშვილი ადასტურებს, რომ 9 აპრილზე ბუნებრივი აირის მილი დაზიანდა.

„9 აპრილის ქუჩაზე, მშენებარე ცხრასართულიან კორპუსში, კოპანიის თანმაშრომლები მრიცხველებს ამონტაჟებდნენ, სწორედ ამ დროს დაზიანდა გაზის მილი. გაზის კომპანიამ უკვე მოგვმართა. ჩვენი თანამშრომლები დაზიანებულ ადგილს ამოთხრიან, გაზის კომპანია კი თავისი აპარატურით შეაკეთებს. სამუშაოები მალე დასრულდება“, – განაცხადა სატელეფონო საუბარში გიორგი ბალახაშვილმა.

გაზის კომპანიაში განმარტავენ, რომ 17:00 საათისთვის ქალაქს გაზმომარაგება სრულად აღუდგება.

[თინათინ ზაზაძე, ახალციხე]