გეოგრაფიის გამოცდაზე 11 აბიტურიენტი არ გამოცხადდა

დღეს, 13 ივლისს აბიტურიენტები გამოცდას არჩევით საგანში, გეოგრაფიაში აბარებენ. მთელი საქართველოს მასშტაბით გეოგრაფიის გამოცდისთვის დაახლოებით 12 500 აბიტურიენტი დარეგისტრირდა. რაც შეეხება ახალციხეს, ორივე სესიაზე რეგისტრირებული სულ 466 აბიტურიენტი იყო. პირველ სესიაზე საგამოცდო ცენტრში 8, მეორე სესიაზე კი 3 აბიტურიენტი არ გამოცხადდა.

შეგახსენებთ, რომ გამოცდები ახალციხის მეხუთე საჯარო სკოლის შენობაში მიმდინარეობს. საქართველოს განათლების სამინისტროს ინფორმაციით, საქართველოს მასშტაბით 11 დიდ ქალაქში 19 საგამოცდო ცენტრია გახსნილი.

ახალციხეში, ისევე, როგორც ყველა საგამოცდო ცენტრთან, მობილიზებულია სახანძრო, სამაშველო და სასწრაფო დახმარების სამსახურები.

ახალციხის საგამოცდო ცენტრთან, ხალხმრავლობის გამო, რუსთაველის ქუჩიდან ახალციხის ცენტრალური პარკისკენ ( და პირიქით) სამანქანო გზა გადაკეტილია. მოძრაობა შეფერხებული გამოცდების დასრულებამდე დარჩება.

საქართველოს განათლებისა და მეცნიერების სამინისტროს ინფორმაციით, წელს ერთიან ეროვნულ გამოცდებზე 40 000 - მდე აბიტურიენტია დარეგისტრირებული.

[თამარ თოთაძე, ახალციხე]