საერთო სამაგისტრო გამოცდაზე 77 მაგისტრანტობის მსურველიდან 7 არ გამოცხადდა

ერთიანი ეროვნული გამოცდების პარალელურად, საგამოცდო ცენტრებში საერთო სამაგისტრო გამოცდები დაიწყო. მაგისტრანტების მსურველებისთვის რეგისტრაცია 14:00 საათზე, გამოცდა კი 15:00 საათზე დაიწყო.

ახალციხის საგამოცდო ცენტრში სულ 77 მაგისტრანტობის მსურველია დარეგისტრირებული, აქედან დღევანდელ გამოცდაზე 7 არ გამოცხადდა. საგამოცდო ცენტრის მენეჯერის თქმით, გამოცდამ მშვიდ ვითარებაში ჩაიარა.

მაგისტრანტობის კანდიდატები გამოცდას ორ ნაწილში, წაკითხულის გააზრებასა და ანალიტიკურ წერაში აბარებენ. ტესტი შედგება ოთხი ნაწილისგან: წაკითხულის გააზრება, ანალიტიკური წერა, ლოგიკური მსჯელობა, რაოდენობრივი მსჯელობა.

სახელმწიფო დაფინანსების განაწილება საერთო სამაგისტრო გამოცდის შედეგების მიხედვით ხდება.

შეფასებისა და გამოცდების ეროვნული ცენტრის ინფორმაციით, სამაგისტრო პროგრამაზე ჩარიცხვის კონკურსში მონაწილეობის გაგრძელებისათვის აუცილებელია საერთო სამაგისტრო გამოცდის 4 ნაწილიდან რომელიმე 3-ში მაინც კომპეტენციის მინიმალური ზღვრის გადალახვა.
სპეციალობის გამოცდას კანდიდატები უშუალოდ სასწავლებლებში ჩააბარებენ.

2015 წლიდან მაგისტრანტობის კანდიდატები მიმართულებების მიხედვით ირჩევენ სამი სხვადასხვა A,B და C ტიპის ტესტიდან ერთ-ერთს.
საერთო სამაგისტრო გამოცდისთვის წელს 12500-ზე მეტი აპლიკანტი დარეგისტრირდა.

საერთო სამაგისტრო გამოცდები 17 ივლისს დასრულდება.

შეგახსენებთ, რომ გამოცდები ახალციხის მეხუთე საჯარო სკოლის შენობაში მიმდინარეობს. საქართველოს განათლების სამინისტროს ინფორმაციით, საქართველოს მასშტაბით 11 დიდ ქალაქში 19 საგამოცდო ცენტრია გახსნილი.

ახალციხეში, ისევე, როგორც ყველა საგამოცდო ცენტრთან, მობილიზებულია სახანძრო, სამაშველო და სასწრაფო დახმარების სამსახურები.
ახალციხის საგამოცდო ცენტრთან, ხალხმრავლობის გამო, რუსთაველის ქუჩიდან ახალციხის ცენტრალური პარკისკენ ( და პირიქით) სამანქანო გზა გადაკეტილია. მოძრაობა შეფერხებული გამოცდების დასრულებამდე დარჩება.

[თამარ თოთაძე, ახალციხე]