სამგზავრო გადაყვანების სააგენტო: „კანონი ისეთი ლიბერალურია, სადგურის მოწყობას მფარველი არ სჭირდება“

სახმელეთო ტრანსპორტის სააგენტოს სამგზავრო გადაყვანების სამმართველოს უფროსი ალექსანდრე იანვარაშვილი აცხადებს, რომ სადგურების მოწყობასა და მგზავრთა გადაყვანასთან დაკავშირებით, კანონში ძალიან ბევრი ხარვეზია: „ეს 2005 წელს გატარებულმა ლიბერალურმა პოლიტიკამ გამოიწვია“.

იანვარაშვილი ახალციხეში სადგურებს შორის არსებული კონფლიქტის შესახებ ინფორმირებულია, თუმცა ამბობს, რომ დეტალებს ვერ იხსენებს: „რაც არ უნდა იყოს, კანონი ისეთი ლიბერალურია, რომ სადგურის მოწყობას მფარველი არ სჭირდება, ეს გამორიცხულია“.

მისი განცხადებით, საკანონმდებლო ხარვეზებთან დაკავშირებით აღნიშნული სამმართველო მუშაობს და ახალი კანონპროექტი მოამზადა კიდეც: „სადგურებთან და მგზავრთა გადაყვანასთან დაკავშრებით კანონპროექტი შემდგომი პროცედურებისთვის მთავრობას უკვე წარედგინა. ამის შემდეგ რა როგორ იქნება, ეს უკვე ჩემს კომპეტენციაში აღარ შედის“.

რაც შეეხება ახალციხეში სადგურებს შორის გაჩენილ კონფლიქტს კანონდარღვევებთან დაკავშირებით, იანვარაშვილის თქმით, ხარვეზების გამო მონიტორინგის სამსახურმა სადგურები მართლაც დააჯარიმა: „რომელი სადგური რა დარღვევისთვის ზუსტად არ მახსოვს. ეს მონიტორინგის სამსახურში გაარკვიეთ“.

მონიტორინგის სამსახურის უფროსის მოადგილე გიგა ესიავა ახალციხეში ავტოსადგურების მუშაობასთან დაკავშირებით კომენტარს არ აკეთებს და აცხადებს, რომ ინფორმაციის მიღებას მხოლოდ მისი წერილობითი ფორმით გამოთხოვის შემთხვევაში შევძლებთ.

"სამხრეთის კარიბჭე" ამ თემაზე მუშაობას აგრძელებს.

შეგახსენებთ, დღეს, დილიდან, ავტოსადგური გაფიცული იყო და არცერთი ტრანსპორტი არ მიიღო. ავტოსადგურის თანამშრომლები და მძღოლები მეორე სადგურის მუშაობას აპროტესტებდნენ.

ახალციხის ცენტრალურ ავტოსადგურში აცხადებენ, რომ ახალი სადგური, რომელიც სტანდარტებს არ შეესაბამება, მათ არაჯანსაღ კონკურენციას უწევს. მეორე სადგურში კი პირობებს ცენტრალურ სადგურს უწუნებენ და ამბობენ, რომ მათთან იმ სადგურიდან გამოქცეული მძღოლები მუშაობენ. რასაც, თავის მხრივ, აბსურდულს უწოდებენ ცენტრალურ სადგურში და მეორე სადგურის იდუმალ მფარველებზე უთითებენ.

[თამუნა უჩიძე, ახალციხე]