ახალციხის ავტოსადგურმა გაფიცვა შეწყვიტა

ამ დროისთვის ყველა საქალაქთაშორისო ტრანსპორტი, მიკროავტობუსებიც და ავტობუსებიც, ავტოსადგურში, კუთვნილ ბაქნებზე დგას.
ავტოსადგურმა მგზავრების მომსახურება სრული დატვირთვით განაახლა. მოსაცდელ დარბაზში შეუშვეს მგზავრებიც.

შეგახსენებთ, დღეს, დილიდან, ავტოსადგური გაფიცული იყო და არცერთი ტრანსპორტი არ მიიღო. ავტოსადგურის თანამშრომლები და მძღოლები მეორე სადგურის მუშაობას აპროტესტებდნენ.

ახალციხის ცენტრალურ ავტოსადგურში აცხადებენ, რომ მეორე სადგური, რომელიც სტანდარტებს არ შეესაბამება, მათ არაჯანსაღ კონკურენციას უწევს. მეორე სადგურში კი პირობებს ცენტრალურ სადგურს უწუნებენ და ამბობენ, რომ მათთან იმ სადგურიდან გამოქცეული მძღოლები მუშაობენ. რასაც, თავის მხრივ, აბსურდულს უწოდებენ ცენტრალურ სადგურში და ახალი სადგურის იდუმალ მფარველებზე უთითებენ.



[თამუნა უჩიძე, ახალციხე]