შპს „პროფესიონალი“: ‘ცენტრალურმა ავტოსადგურმა თავის პირობებს გადახედოს’

შპს „პროფესიონალში“ ამბობენ, რომ ახალციხის ავტოსადგურის პროტესტის არ ესმით. მათი განცხადებით, ცენტრალური ავტოსადგურის შეფერხებულ მუშაობასთან, მათი სადგური არაფერ შუაშია.

„გვაქვს ოთახი, სადაც მგზავრებს შეუძლიათ მოისვენონ, სხვა მხრივ რა პირობებს უნდა ვაკმაყოფილებდეთ?“ – ამბობს შპს „პროფესიონალის“ დირექტორის მოადგილე აშოტ ფადარაშვილი.

შპს „პროფესიონალი“ თამარაშვილის ქუჩაზე, რკინიგზის სადგურის მიმდებარე ტერიტორიაზე მდებარეობს. სადგურს 35–მდე მძღოლი ჰყავს. დირექტორის მოადგილე ამბობს, რომ მათთან სამუშაოდ ის მძღოლები გადავიდნენ, ვინც ცენტრალურმა სადგურმა აიძულა: „აქ არიან ის მძღოლები, რომლებიც ნუგზარ მამუკაშვილმა გამოყარა. იგი მძღოლებს ფულს ართმევდა, ჯიბეს ისქელებდა და როცა ეს ვეღარ აიტანა ხალხმა, მას შემდეგ წამოვიდა“.

ახალციხე–თბილისის მარშრუტის მძღოლი ბორის რაზმაძე ამბობს, რომ მას ცენტრალურ სადგურში სამუშაოდ ადგილი აღარ დაუტოვეს: „აქ გვაქვს ყველა პირობა იმისთვის, რომ ვიმუშაოთ. იქ ნუგზარ მამუკაშვილმა შემოიყვანა თავისი მანქანები და აღარ დარჩა ადგილი „რეისი“ რომ შემესრულებინა“.

რაც შეეხება ფასებზე გაწეულ კონკურენციას, „პროფესიონალში“ ამბობენ, რომ ახალციხიდან თბილისის მიმართულებით მათაც 6 ლარად მიჰყავთ მგზავრები. თბილისდან უკან კი 8 ლარად ბრუნდებიან: „მძღოლები არაფერ შუაში არიან, ფასებს სადგური ადგენს“.

შპს „პროფესიონალის“ ადმინისტრაცია, იმას თუ რა ფართშია განთავსებული ავტოსადგური, ვერ აკონკრეტებს.

"ზუსტად არ ვიცი", – ამბობს აშოტ ფადარაშვილი.

იგი არ მალავს, რომ საგზაო დეპარტამენტმა სადგური ერთხელ ნამდვილად დააჯარიმა, თუმცა, არა სტანდარტების დაუცველობის გამო: „საკასო სალარო არ გვქონდა და 500 ლარით დავჯარიმდით. სხვა ჯარიმა არ გვქონია, ან რატომ უნდა გვქონდეს? შესანიშნავად ვემსახურებით მგზავრებს“.

რაც შეეხება მგზავრების წართმევას, "პროფესიონალში" არც ეს ესმით და ამბობენ, რომ პირიქით, ტრანსპორტი ცენტრალური სადგურიდან უფრო ადრე გადის, თუმცა, თავად აქვე ამბობენ, რომ ყოველ ნახევარ საათში გადიან.

„იმისთვის, რომ ახლა ვიმუშაოთ, ყველანაირ სტანდარტს ვაკმაყოფილებთ. ყოფილი ღვინის ქარხნის ტერიტორიაზე დაწყებულია ახალი სადგურის მშენებლობა. ეს იქნება ევროპული სტანდარტების შესაბამისი სადგური. როგორც კი აშენდება, იქიდან გავაგრძელებთ მუშაობას“, – ამბობს დირექტორის მოადგილე და ამატებს, – „ცენტრალურმა სადგურმა თავის პირობებს გადახედოს, საპირფარეშოს რომ ჰგავს. ჩვენ რა პირობებს გვიწუნებს“.

შეგახსენებთ, დღეს, 4 ივლისს, დილიდან, ახალციხის ცენტრალური ავტოსადგური გაიფიცა და არცერთი საქალაქთაშორისო ტრანსპორტი სადგურში არ მიიღო.

"სამხრეთის კარიბჭე" კვლავ აგრძელებს თემაზე მუშაობას.

[თამუნა უჩიძე, ახალციხე]