შპს ‘ჯეოტივი’: მეორე სადგურს მფარველი რომ არ ჰყავდეს, ვერ იმუშავებდა

შპს „პროფესიონალის“ განცხადებებს, ცენტრალური სადგურიდან მძღოლების იძულების შესახებ, შპს „ჯეოტივში“ პასუხობენ.

„ჯეოტივის“ დირექტორი ნუგზარ მამუკაშვილი ამბობს, რომ მას მძღოლები არ გაუგდია: „მე შემოვიყვანე ახალი მანქანები, როგორებიც მანამდე ჩვენთან არ არსებობდა, იმისთვის, რომ მგზავრთა გადაყვანა უფრო კომფორტული ყოფილიყო. შევთავაზე მძღოლებს ამ მანქანებზე ემუშავათ, მაგრამ უარი განაცხადეს, ცოტა ფული დაგვრჩებაო“.

მამუკაშვილი ამბობს, რომ შპს „პროფესიონალის“ დირექტორის მოადგილის აშოტ ფადარაშვილის განცხადება, თითქოს, ცენტრალურ სადგურში მძღოლებისგან ფულს იღებენ, ცილისწამებაა და ამაზე პასუხს მოითხოვს: „აშოტ ფადარაშვილს ჩემთან არც კი უმუშავია“.

შპს „ჯეოტივსა“ და ცენტრალურ ავტოსადგურში ფიქრობენ, რომ „პროფესიონალს“ ადგილობრივ ხელისუფლებაში მფარველები ჰყავს. წინააღმდეგ შემთხვევაში, სადგური ვერ იმუშავებდა. „ჯეოტივში“ ამის დამადასტურებელი არგუმენტებიც აქვთ.

„ჩვენ მივწერეთ გუბერნიას, ქალაქის მერიას, სამცხე–ჯავახეთის სამხარეო სამმართველოს და იმ კანონდარღვევების შესახებ ვაცნობეთ, რის მიხედვითაც მეორე სადგური მუშაობს“, – ამბობენ „ჯეოტივში“.

ჩამონათვალი, რასაც „ჯეოტივში“ დარღვევას უწიდებენ და რაშიც მფარველობის ნიშნებს ხედავენ, საკმაოდ შთამბეჭდავია.

„სადაც ხდება მგზავრთა ჩასხდომა, იმ მანძილით არ არის დაშორებული ცენტრალურ მაგისტრალს, როგორც ამას კანონმდებლობა არეგულირებს. შესაბამისად, მგზავრთა გადაყვანა უსაფრთხო არ არის. გარდა ამისა, როცა ამ ადგილზე გააკეთეს ავტოსადგური, დააყენეს ავტობუსის გაჩერების ნიშანი, რაც კანონთან შეუსაბამობაშია. ეს არის ავტოსაგზაო მოძრაობის წესების დარღვევა. ამაზე კი საპატრულო პოლიცია თვალს ხუჭავს. ასევე, როცა ამ ტერიტორიაზე დახაზეს პირველი, მეორე და მესამე ბაქანი ავტობუსების გასაჩერებლად, ეს ტერიტორია ეკუთვნოდა ქალაქის მერიას. რომ არა მერიის სიტყვიერი ნებართვა, თორემ ოფიციალურად, წერილობით, ვერ გასცემდნენ, ისინი ცენტრალურ მაგისტარლთან ასე ახლოს ბაქანს ვერ დახაზავდნენ“, – გვიხსნის მამუკაშვილი.

ცენტრალურ სადგურში ფიქრობენ, რომ „პროფესიონალის“ მუშაობა კანონიერი არც ახალი სადგურიდან იქნება: „ავტობუსი სადგურში რომ შევიდეს, უნდა გადაკვეთოს ტროტუარი, იქ არის შუქნიშანიც და მოძრაობენ სკოლის მოსწავლეები. შეუძლებელია ამ ადგილზე მობრუნდეს მაგალითად 13–მეტრიანი რუსთავის ავტობუსი. შესაბამისად, ავტოსადგურის მისამართის შეცვლა მათ მუშაობას კანონიერ ფარგლებში ვერ მოაქცევს. გარდა ამისა, აქ მთავარი ის არის, რომ ქალაქის მერიამ ნებართვა გასცა ამ ადგილზე ავტოსადგომის მშენებლობაზე და არა ავტოსადგურის“.

„ჯეოტივში“ არადამაჯერებლად ეჩვენებათ მერიის პასუხიც, იმის შესახებ, თითქოს საგზაო დეპარტამენტიდან მიღებული პასუხით, „პროფესიონალი“ მეოთხე სტანდარტს აკმაყოფილებს: „არსებობს ავტოსადგურების მოწყობის მხოლოდ სამი კლასი, მეოთხე არ არსებობს“.

„ტექნიკური რეგლამენტის „ავტოსადგურის ფუნქციონირების წესისა და პირობების“ დამტკიცების თაობაზე“,საქართველოს მთავრობის 2013 წლის 31 დეკემბრის N442 დადგენილების, მე–4 მუხლის პირველ ქვეპუნქტში, მართლაც ნათქვამია, რომ "ავტოსადგურები მომსახურების, უსაფრთხოებისა და მომხმარებელთა საკუთრების დაცვის დონის მიხედვით იყოფა პირველი, მეორე და მესამე კლასის ავტოსადგურებად".

შეგახსენებთ, დღეს, 4 ივლისს, დილიდან, ახალციხის ცენტრალურმა ავტოსადგურმა, პროტესტის ნიშნად, საქალაქთაშორისო ტრანსპორტი არ მიიღო. სადგურში აცხადებენ, რომ „პროფესიონალი“, რომელიც სადგურის სტანდარტებს არ აკმაყოფილებს, მათ არაჯანსაღ კონკურენციას უწევს. „პროფესიონალში“ ცენტრალური სადგურის პროტესტის არ ესმით და ამბობენ, რომ მათთან იმ სადგურიდან გამოქცეული მძღოლები გადავიდნენ, თავად კი ამ ეტაპზე მუშაობისთვის ყველა პირობა აქვთ და მალე ახალი, თანამედროვე სტანდარტების სადგური ექნებათ.

[თამუნა უჩიძე, ახალციხე]