დღეს დილიდან ახალციხის ავტოსადგური გაფიცულია

ასე გამოიყურება დღეს დილიდან ახალციხის ავტოსადგური

ახალციხის ავტოსადგური დღეს დილიდან ცარიელია, არცერთი მიკროავტობუსი და ავტობუსი სადგურის ტერიტორიაზე არ შედის. ის მძღოლები, რომლებიც თავიანთ მარშრუტზე მოძრაობენ, მგზავრების შესავსებად სადგურის მოშორებით, ქუჩაში დგანან. ქუჩაშივე ჩერდება სხვა ქალაქებიდან ჩამოსული სამგზავრო ტრანსპორტიც.

ავტოსადგურის მიმდებარე ტერიტორიაზე წესრიგისა და უსაფრთოხების უზრუნველსაყოფად, დილიდან მობილიზებულია საპატრულო პოლიცია.

ახალციხის ავტოსადგურში გაფიცვას არასწორი კონკურენციით ხსნიან და ამბობენ, რომ მათ სხვა გამოსავალი არ აქვთ. ავტოსადგურის ადმინისტრაცია გვიხსნის, რომ მას შემდეგ, რაც ახალციხეში, კერძოდ, რაბათის უბნის შესასვლელში, მეორე ავტოსადგური, შპს „პროფესიონალი“ გაიხსნა, ცენტრალური ავტოსადგური ფაქტობრივად ვეღარ მუშაობს.

„მეორე ავტოსადგური არანაირ სტანდარტს არ აკმაყოფილებს, არ აქვთ მგზავრების მოსასვენებელი პუნქტი, არ ჰყათ ექიმი, „რეისები" სრულდება „საპარიკმახეროდან“, – ამბობს ახალციხის ავტოსადგურის დირექტორი სლავა ჩიხლაძე.

სწორედ ამ მახასიათებლების გამო უწოდებენ კონკურენციას არასწორს ცენტრალური ავტოსადგურის თანამშრომლები და ის მძღოლები, რომლებიც ამ სადგურში ჩერდებიან.

გარდა ამისა, მძღოლები ამბობენ, რომ მეორე სადგურისთვის რეალური კონკურენცია რომ გაეწიათ, მგზავრობა გააიაფეს.

„ახლა ახალციხის ცენტრალური ავტოსადგურიდან „რეისი“ სრულდება 6 ლარად, იქიდან 8 ლარად. ამის გამო მიღებული შემოსავალი არაფერში გვყოფნის“, – ამბობენ მძღოლები.

„მაგალითად, ბანკების ვალი მაქვს, რითი გადავიხადო“, – გვეუბნება ერთ–ერთი მძღოლი გია კაპანაძე.

მიუხედავად სადგურის პროტესტისა, მარშრუტები არ ჩაშლილა.

„90 მძღოლი მყავს და მათგან გაფიცული არცერთია, ოღონდ სადგური არ ღებულობს მათ“, – ამბობს შპს „ჯეოტივის“ ხელმძღვანელი ნუგზარ მამუკაშვილი.

მომხდარის შესახებ საქმის კურსშია ახალციხის მერია. დილიდან ავტოსადგურში იმყოფებიან ახალციხის მერიის თანამშრომლები, მათ შორის, მერის მოადგილე ზაზა გელაძე და ახალციხის მერიის ურბანული მოწყობისა და საქალაქო მეურნეობის სამსახურის უფროსი გელვასი გელაძე.

მერის მოადგილე ზაზა გელაძე ამბობს, რომ მას შემდეგ რაც მეორე სადგური გაიხსნა, მერიამ საგზაო დეპარტამენტს ოფიციალური წერილი გაუგზავნა. როგორც ურბანული მოწყობის და საქალაქო მეურნეობის სამსახურის უფროსი გელვასი გელაძე ამატებს, მათ გაზომეს მეორე სადურის ტერიტორია და წერილში ეს მონაცემებიც მიუთითეს.

„საგზაო დეპარტამენტიდან მივიღეთ პასუხი, რომ შპს „პროფესიონალი“ აკმაყოფილებს მეოთხე სტანდარტს“, – გვეუბნება ზაზა გელაძე და ამატებს, რომ მძღოლებს აქვთ ისეთი ხასიათის პრობლემა, რაშიც მერია ვერ ჩაერევა, – „ცენტრალური სადგურის მძღოლებს „რეისების“ შესრლებაზე აქვთ პრობლემა, ისინი რომ გადიან,მეორე სადგურიდან უკვე გასულები არიან და მგზავრებს ართმევენ. აი ამაში მე რა გავაკეთო, როგორ შემიძლია დავარეგულირო“.

გელვასი გელაძის თქმით, დეპარტამენტიდან მიღებულ წერილში ასევე ნათქვამი იყო, რომ თუ კიდევ რაიმე კითხვები არსებობს, მერიამ სამართალდამცავებს უნდა მიმართოს.

როგორ გაგრძელდება ვითარება, ამ ეტაპზე უცნობია. სლავა ჩიხლაძე ფიქრობს, რომ შპს „პროფესიონალს“ ვიღაც მფარველობს: „მეორე სადგურს რომ ვინმე არ „კრიშავდეს“ და ეს ვიღაცას არ აწყობდეს, ამ პირობებში არ შეიძლება მას მუშაობის უფლება ჰქონდეს“.

ნუგზარ მამუკაშვილი კი ამბობს, რომ თუ ვითარება თუ არ შეიცვლება, არ არის გამორიცხული მისი მძღოლებიც გაიფიცნონ.

ამ დრომდე ადგილზე რჩება და თემაზე მუშაობას აგრძელებს „სამხრეთის კარიბჭე“.

[თამუნა უჩიძე,ახალციხე]