N1 სკოლის პედაგოგმა მედლების საქმეზე გაფრთხილება მიიღო

ახალციხის N1 საჯარო სკოლის ისტორიის მასწავლებელს, ნუნუ ოქრომელიძეს, რომლის შეცდომის გამო შესაძლოა 10 მოსწავლე ოქროს მედლის გარეშე დარჩეს, სკოლის დისციპლინურმა კომიტეტმა წერილობითი გაფრთხილება მისცა.

დისციპლინური კომიტეტი საჯარო სკოლაში დღეს, 29 ივნისს შეიკრიბა.
სკოლის დირექტორი ჟუჟუნა გოგოლაური განმარტავს, რომ წერილობითი გაფრთხილება პედაგოგის პირად საქმეში ჩაიკვრება, გარდა ამისა გამოიკვრება სკოლაში, საინფორმაციო დაფაზე.

შეგახსენებთ, რომ N1 საჯარო სკოლის 10 მოსწავლე განათლებისა და მეცნიერების სამინისტროს მიერ გამოქვეყნებული მედალოსნების სიაში იმის გამო ვერ მოხვდა, რომ მასწავლებელს ქართული საბრძოლო ხელოვნების ისტორიაში, საკონტროლო წერაში შეფასება არ ჰქონდა გაკეთებული.

განათლებისა და მეცნიერების სამინისტროსა და სკოლის ადმინისტრაციაში ირწმუნებიან, რომ მოსწავლეები ოქროს მედლებს აუცილებლად მიიღებენ.

[თინათინ ზაზაძე, ახალციხე]