მედლების საქმეზე, მეექვსე სკოლის პედაგოგებმა გაფრთხილებები მიიღეს

სკოლის დისციპლინარულმა კომიტეტმა ერთკვირიანი მუშაობა დღეს, 30 ნოემბერს დაასრულა.

„ერთმა საყვედური მიიღო,რადგან განმეორებითი შემთხვევა იყო, თუმცა ეს არ ეხება ჟურნალების თემას. დანარჩენებმა მიიღეს გაფრთხილებები“, – განაცხადა დისციპლინარული კომიტეტის თავმჯდომარემ მარეხ დვალიშვილმა.

შეგახსენებთ, რომ საქმე ეხება ამავე სკოლის ვერცხლისა და ოქროს მედლებზე წარდგენილ მოსწავლეებს. საკლასო ჟურნალებში გადასწორებული ნიშნების გამო ექვსი მოსწავლიდან ხუთი შესაძლოა მედლის გარეშე დარჩეს, რადგან განათლების სამინისტროს სპეციალურმა კომისიამ სკოლას რეკომენდაცია არ მისცა.

სკოლის ადმინიტრაციის განმარტებით, პედაგოგებმა განაცხადეს, რომ შეცდომა მოუვიდათ და აქ მოსწავლის ბრალეულობა არ იკვეთება. მათ დაწერეს ახსნა–განმარტებებიც.

სკოლის დისციპლინარულმა კომიტეტმა აღნიშნულ საკითხზე მსჯელობა განათლების სამინისტროდან გასულ კვირას მიღებული რეკომენდაციის შემდეგ დაიწყო.

მეექვსე საჯარო სკოლის გარდა, მსგავსი პრობლემაა ახალციხის მუნიციპალიტეტის კიდევ რამდენიმე სკოლაში. სამინისტროს კომისიამ ოქროს და ვერცხლის მედალზე არ წარდგენის რეკომენდაცია გასცა აწყურის, წყრუთის და ვალის პირველი სკოლის თითო მოსწავლეზე და ასევე, ვალის მეორე სკოლის ოთხ მოსწავლეზე. მსგავსი პრობლემაა ახალციხის პირველ საჯარო სკოლაშიც.

[თინათინ ზაზაძე, ახალციხე]