მეექვსე სკოლის მოსწავლეების მედლების საქმეზე მასწავლებლებს დაკითხავენ

დღეს, 14 მარტს, ახალციხის რაიონულ სასამართლოში ახალციხის მეექვსე საჯარო სკოლის წინააღმდეგ დაწყებულ საქმეზე პირველი სხდომა ჩატარდა. მოსარჩელე მხარის ინტერესებს ‘ახალგაზრდა იურისტთა ასოციაციის’ ადვოკატები მაია გრძელიშვილი და ქეთევენ ბებიაშვილი იცავენ. მოპასუხე მხარე მეექვსე სკოლის დირექტორი გია კაპანაძე და ახალციხის საგანმანათლებლო რესურსცენტრის იურისი გია დალალიშვილია. საქმეში მესამე პირად განათლების სამინისტროს წარმომადგენელი მარეხი მაღრაძეა ჩართული.

დღევანდელ სხდომაზე მხარეებმა მასწავლებლების დაკითხვის შუამდგომლობა დააყენეს. მოსამართლემ ეს შუამდგომლობა დააკმაყოფილა, – სხდომებზე მეექვსე სკოლიდან ათ მასწავლებელს დაკითხავენ.

„ჩვენი ორი აქტის ბათილად ცნობას ვითხოვთ. 14 ნოემბრის, რომლითაც პირველად ეთქვათ უარი ამ მოსწავლეებს ოქროს მედლების კანდიდატებად წარდგენაზე და დეკემბრის, როდესაც განმეორებით მოვითხოვეთ წარდგენა, რადგან მოსწავლეების ბრალეულობა არ იკვეთებოდა“, – ამბობს საიას იურისტი ქეთი ბებიაშვილი.

მოსარჩელე მხარე ახალი აქტის გამოცემას ითხოვს, რითაც ამ მოსწავლეებს ხელახლა წარადგენენ ოქროს მედლის კანდიდატებად.

ამ საქმეზე მომდევნო სხდომა მოსამართლე გია ბერაიამ 27 მარტს, 13:00 საათზე დანიშნა. მანამდე მხარეებს აქვთ დრო მორიგებისთვის. მოსარჩელე მხარე მორიგებაზე თანახმაა, მპასუხე მხარე, სკოლის დირექტორი კი დროს ითხოვს.

„საქმე გადაგზავნილია შიდა აუდიტიში და მე მათ დასკვნას ველოდები. რეკომენდაციის მიღების შემდეგ მივიღებ გადაწყვეტილებას“, – განაცხადა სკოლის დირექტორმა გია კაპანაძემ.

განათლების სამინისტროს წარმომადგენლის მარეხ მაღრაძის განცხადებით, მორგებაზე გადაწყვეტილებას სამინისტრო ვერ მიიღებს, ეს სკოლის ადმინისტრაციის გადასაწყვეტია.

„მათ გადმოაგზავნეს, რომ არ ყოფლიყვნენ ეს მოსწავლეები ოქროს და ვერცხლის მედალოსან კანდიდათა სიაში“, – ამბობს მარეხ მაღრაძე.
შეგახსენებთ, რომ საქმე ეხება სკოლის ვერცხლისა და ოქროს მედლებზე წარდგენილ მოსწავლეებს. საკლასო ჟურნალებში გადასწორებული ნიშნების გამო ექვსი მოსწავლიდან ხუთმა მედალი ვერ მიიღო.

[თინათინ ზაზაძე, ახალციხე]