მედალოსანთა სიის მიღმა დარჩენილი მოსწავლეები მედლებს მიიღებენ

N1 საჯარო სკოლის 10 ოქროს მედალოსანი მოსწავლე დამსახურებულ მედლებს მიიღებს. აღნიშნულთან დაკავშირებით განათლებისა და მეცნიერების სამინისტრომ ინფორმაცია დღეს, 30 ივნისს გაავრცელა.

როგორც სამინისტროს ოფიციალურ გვერდზეა აღნიშნული “2014-2015 სასწავლო წელს სრული ზოგადი განათლების ოქროსა და ვერცხლის მედალოსანი მოსწავლეების სიის დამტკიცების თაობაზე” საქართველოს განათლებისა და მეცნიერების მინისტრის 2015 წლის 19 ივნისის N580 ბრძანება ნაწილობრივ ძალადაკარგულად გამოცხადდა და ცვლილები შევიდა.

„უკვე გავიგე, რომ ოქროს მედალს მივიღებ. ლოგიკური გადაწყვეტილება იყო, ძალიან გახარებული ვარ“, – ამბობს მეთორმეტე კლასის მოსწავლე მარი ნებაძე.

შეგახსენებთ, რომ N1 საჯარო სკოლის 10 მოსწავლე, იმის გამო, რომ არჩევით საგანში, ქართული საბრძოლო ხელოვნების ისტორიაში პედაგოგს შემაჯამებელი შეფასება არ ქონდა გაკეთებული, მედალოსნების სიაში ვერ მოხვდა.

[თინათინ ზაზაძე, ახალციხე]