გარემოს დაცვის სამინისტროს მიერ გამოგზავნილმა გეოლოგებმა ახალციხის მუნიციპალიტეტის სოფლები უკვე შეისწავლეს. დასკვნა, საფრთხის შემცველი რა ტერიტორიებია ახალციხის მუნიციპალიტეტში, რამდენიმე დღეში დაიდება. ამ ეტაპზე მასალების მომზადება მხოლოდ აწყურის შესახებ დასრულდა.
ახალციხის მუნიციპალიტეტის გამგეობის ინფრასტრუქტურის სამსახურის უფროსი ნოდარ ბალახაშვილი ამბობს, რომ მიუხედავად იმისა, რომ ჯერ საბოლოო დასკვნა არ აქვთ, მოსალოდნელი სტიქიის შესახებ ინფორმაციის მიღებისთანავე სოფლებში პრევენციული ღონისძიებები ტარდება.
ამინდის გაუარესების შესახებ ინფორმაციას კი, როგორც ახალციხეს, ისე სხვა მუნიციპალიტეტებს, სამცხე – ჯავახეთის სამხარეო ადმინისტრაცია აწვდის, რომელსაც აღნიშნულ ინფორმაციას გარემოს ეროვნული სააგენტოს ჰიდრომეტეოროლოგიური დეპარტამენტი ატყობინებს.
„როგორც კი გუბერნიიდან მივიღებთ ინფორმაციას მოსალოდნელი საფრთხის შესახებ, ყველა სოფლის რწმუნებულს ვატყობინებთ, ისინი კი მოსახლეობას აფრთხილებენ. ზოგადად, პრევენციისთვის, მუნიციპალიტეტში შექმნილია მუდმივმოქმედი კომისია, რომელიც მუდამ მზადყოფნაშია“, – ამბობს ნოდარ ბალახაშვილი და ამატებს, რომ რამდენიმე დღის წინ, მსგავსი ინფორმაციის მიღების შემდეგ, გამგეობის წარმომადგენლებმა ვალეში მდინარეს კალაპოტი შეუცვალეს და მოსახლეობის ნათესები დატბორვას გადაარჩინეს.
ადიგენის მუნიციპალიტეტის გამგეობაში ამბობენ, რომ მუნიციპალიტეტში თითქმის ყველა სოფელი მეტ–ნაკლებად მეწყერსაშიშია.
„შევისწავლეთ სოფლების დაზიანების ხარისხი და აღმოჩნდა, რომ მუნიციპალიტეტის თთქმის 60 პროცენტი, ზოგან მეტად, ზოგან ნაკლებად დამეწყრილია“, – ამბობს ადიგენის მუნიციპალიტეტის გამგეობის ინფრასტრუქტურის სამსახურის მთავარი სპეციალისტი პავლე თათოშვილი.
მისივე თქმით, ადიგენის მუნიციპალიტეტში პრევენციული ღონისძიებები სისტემატურად ტარდება: „განსაკუთრებით ხანგრძლივი უამინდობის დროს. ჩვენი ტექნიკით ვწმენდთ სანიაღვრე არხებს, მდინარეების კალაპოტებსა და სოფლის გზებს“.
ბორჯომის მუნიციპალიტეტის სოფლები: საკირე, დგვარი, ტაძრისი, ჭობისხევი, ასევე, ბორჯომში გამარჯვების ქუჩაზე არსებული, ეგრეთ წოდებული, ცოფიანი ღელე და ნიკოლაძის ქუჩის მიმდებარე ტერიტორია – იმ ადგილების ჩამონათვალია, რომლებიც ბორჯომის გამგეობის წარმომადგენლების თქმით, მეწყერსაშიშ ზონებად ითვლება.
„მუნიციპალიტეტში არიან პასუხისმგებელი პირები, რომლებსაც ეხებათ პრევენციული ღონისძიებების გატარება. ზოგადად, ჩვენ ყოველთვის ვაშენებთ ნაპირსამაგრი და საყრდენი კედლების მშენებლობას“, – ამბობს ბორჯომის მუნიციპალიტეტის გამგებლის მოადგილე რევაზ კალაძე.
ასპინძის მუნიციპალიტეტში მეწყერსაშიშ ზონად სოფლები: ნაქალაქევი და აწყვიტა ითვლება. როგორც ასპინძის მუნიციპალიტეტის გამგებლის მოადგილე ალექსანდრე პაპაშვილი ამბობს, აღნიშნული სოფლები ისეა დამეწყრილი, რომ იქ ცხოვრება მოსახლეობისთვის დიდ საფრთხეს წარმოადგენს.
„ნაქალაქევი და აწყვიტა ჯერ კიდევ 1950 წლიდან არის დაფიქსირებული მეწყერსაშიშ ზონად. ამ სოფლებში პრევენციული ღონისძიებების გატარება უკვე შეუძლებელია, ერთადერთი გამოსავალია, აღნიშნული ტერიტორიებიდან მოსახლოება გავიყვანოთ“, – ამბობს პაპაშვილი და ამატებს, რომ მუნიციპალიტეტში სხვა მეწყერაშიში ზონები არ არის: „ოთის წყლის ადიდების საშიშროება იყო ხოლმე, მაგრამ ახლა ამის საფრთხეც აღარ არსებობს, გასულ წელს ნაპირსამაგრი კედლები გავაკეთეთ“.
ახალქალაქისა და ნინოწმინდის მუნიციპალიტეტების წარმომადგენლების თქმით, ჯავახეთში ძირითადად მოსწორებული ტერიტორიებია, ამიტომ მეწყერსაშიში ზონები თითქმის არ არსებობს.
„ჩვენსკენ მეწყერსაშიში ზონები ნაკლებად არის, ეს მარტო ეხება ხევისპირებს, თურქეთის საზღვრიდან დაწყებული თითქმის ახალქალაქამდე, ამ ადგილებში მოსალოდნელია ღვარცოფები, თუმცა სწორედ ამ ტერიტორიაზე, სისტემატურად მიმდინარეობს გაწმენდითი სამუშაოები“, – ამბობს ახალქალაქის მუნიციპალიტეტის გარემოს დაცვისა და აგრარულ საკითხთა განყოფილების უფროსი რამაზ ხუციშვილი.
[მანანა სარაშვილი, სამცხე–ჯავახეთი]