ახალციხის მუნიციპალიტეტში კორონავირუსთან დაკავშირებით პრევენციული ღონისძიებები მიმდინარეობს ®

სპეციალური ხსნარით დამუშავდა სამცხე-ჯავახეთის სახელმწიფო უნივერსიტეტის, საზოგადოებრივი კოლეჯის „ოპიზარის“, სათნოების სახლის, ახალციხის კულტურის სახლის, ქალაქის ცენტრალური და რაბათის ბიბლიოთეკების შენობები. სადეზინფექციო სამუშაოები ჩაუტარდა რეკრეაციულ ზონებს - ცენტრალური პარკსა და ქალაქის მასშტაბით არსებულ ყველა სკვერს, ასევე, ახალციხის ციხისა და ხელოვნური ტბის მიმდებარე ტერიტორიებს.

დღეს, სადეზინფექციო სამუშაოები გაგრძელდება მუნიციპალიტეტის საბავშვო ბაღებში, სამხატვრო, მუსიკალურ და სასპორტო სკოლებში, ადმინისტრაციულ შენობებსა და სხვა საზოგადოებრივი თავშეყრის ადგილებში. პრევენციულ ღონისძიებებს სპეციალური ჯგუფები ახორციელებენ, რომელსაც კოორდინაციას და მონიტორინგს ახალციხის მუნიციპალიტეტის მერიის შესაბამისი სამსახური და ა(ა)იპ „ახალციხის საზოგადოებრივი ჯანდაცვის სამსახური“ უწევენ.

აღსანიშნავია, რომ პრემიერ-მინისტრის ხელმძღვანელობით შექმნილი საკოორდინაციო საბჭოს ფარგლებში უკვე ამოქმედებულია საკოორდინაციო სამუშაო ჯგუფები მხარის რწმუნებულების ხელმძღვანელობით. სამუშაო ჯგუფებს კოორდინაციას რეგიონული განვითარებისა და ინფრასტრუქტურის სამინისტრო და საქართველოს პრემიერ-მინისტრის მრჩეველი რეგიონალურ საკითხებში სოზარ სუბარი უწევენ.