ბორჯომის N1 საჯარო სკოლამ სასკოლო თეატრალურ ფესტივალზე მეორე ადგილი დაიკავა

სასკოლო თეატრალური ფესტივალის ფარგლებში, საქართველოს საჯარო და კერძო სკოლებს საშუალება მიეცათ ვაჟა-ფშაველას ნაწარმოებების მიხედვით სპექტაკლები მოემზადებინათ.

განათლების სამინისტროში კომისიის წევრებმა ფრაგმენტულად განმეორებით ნახეს საჯარო სკოლების მიერ მომზადებული სპექტაკლები და ერთობლივი მსჯელობის შედეგად, პირველი, მეორე, მესამე ადგილების მფლობელი და ჟიურის მიერ დაწესებულ ნომინაციაში გამარჯვებული სპექტაკლები გამოავლინეს.

პირველი ადგილი ბათუმის წმინდა ანდრია პირველწოდებულის სახელობის სკოლამ დაიკავა, მეორე ადგილი კი ბორჯომის N1 საჯარო სკოლას ხვდა წილად, მესამე ადგილზე ხობის N1 საჯარო სკოლა გავიდა. ხოლო ქალაქ ფოთის N4 საჯარო სკოლამ ჟიურის ნომინაციაში გაიმარჯვა.

გარდა საპრიზო ადგილებისა, ჟიურიმ 10 სპექტაკლი გამოავლინა, რომელთა წარმომდგენი სკოლები წამახალისებელ სიგელებს მიიღებენ.

ფესტივალის მიზანი იყო ვაჟა-ფშაველას ღვაწლის პოპულარიზაცია, მოსწავლეთა შემოქმედებითი უნარების გამოვლენა და განვითარება. ფესტივალი ორ ეტაპად ჩატარდა: პირველ ეტაპზე, საგანმანათლებლო რესურსცენტრებმა შეარჩიეს არაუმეტეს 5 სპექტაკლისა, რომლებიც საჯაროდ დაიდგა მუნიციპალიტეტის დონეზე და მათ შორის 1 საუკეთესო სპექტაკლის ვიდეოჩანაწერი სამინისტროში გაიგზავნა.

განათლებისა და მეცნიერების სამინისტროს ინფორმაციით, სამინისტროში შექმნილმა სპეციალურმა კომისიამ, რომელიც შედგება როგორც სამინისტროს სტრუქტურული ერთეულების წარმომადგენლების, ისე პროფესიონალი და ცნობადი სახეებისაგან (გოგი დოლიძე, ანი მიროტაძე, ერეკლე ტრიპოლსკი, მიხო მოსულიშვილი, მზია არაბული, გოდერძი შარაშია, ლელა რაზიკაშვილი) დასკვნით ეტაპზე 32 სპექტაკლი განიხილა. ჟიურის წევრებს წინასწარ მიეწოდათ აღნიშნული სპექტაკლების ვიდეო ჩანაწერები და პირველადი შერჩევის შედეგად, 17 სპექტაკლი გამოვლინდა.

[Sknews.ge]