რატომ ითხოვდა ”ოცნება” ”დამალის” უბნის გაუქმებას

ინციდენტი უბანზე დილით, 09:30 წუთზე მოხდა. „ქართული ოცნების“ წევრი კომისიაში დურმიშხან გრიგალაშვილი ამბობს, რომ კენჭისყრის ოთახში ერთი ქალბატონი ხანდაზმულ ამომრჩევლებს კაბინაში მიჰყვებოდა და ბიულეტენის შემოხაზვაში ეხმარებოდა.

„ამ ფაქტთან დაკავშირებით მაშინვე დავწერე 2 საჩივარი“- განაცხადა დურმიშხან გრიგალაშვილმა.

#4 საუბნო კომისიის თავმჯდომარის მგერ ნახაპეტიანის თქმით, უბანზე დარღვევა არ მომხდარა.

„მოხუცი ქალი შემოვიდა, რომელიც ვერ ხედავდა. ასეთ დროს მე უფლება მაქვს, ნებისმიერ ადამიანს ვთხოვო რომ დაეხმაროს ამომრჩეველს, კუთხეში მდგომ გოგონას, რომელსაც მწვანე პერანგი ეცვა, ვთხოვე რომ შეჰყოლოდა. გრიგალაშვილს აღნიშნული გოგონა კომისიის წევრი ეგონა, ამ ფაქტზე დაწერა საჩივარი, რასაც არ ვეთანხმები, რადგან ეს დარღვევა არ ყოფილა,“- განახადა მგერ ნახაპეტიანმა.

დურმიშხან გრიგალაშვილი აცხადებს, რომ ეს ქალბატონი რამდენიმე ამომრჩეველს შეჰყვა.

აღნიშნულის გამო დამალას უბანზე ეუთოს მისიის წარმომადგენლებიც იმყოფებოდნენ, რომლებიც შემთხვევის შესახებ დეტალებს იკვლევდნენ. მათ კომენტარისგან თავი შეიკავეს, იმ მოტივით, რომ კონკრეტულ დარღვევებზე კომენტარის გაკეთების უფლება არ აქვთ.

დამალის უბანზე 1345 ამომრჩეველია რეგისტრირებული, გადასატანი ყუთის სიაში კი 46 მოქალაქეა დაფიქსირებული. დამალა ასპინძის მუნიციპალიტეტის ეთნიკური სომხებით დასახლებული სოფელია.

[sknews.ge]