N35 აწყურის უბანზე 2 შენიშვნა და 1 საჩივარი დაიწერა

აწყურის 35–ე საარჩევნო უბანზე პირველი შენიშვნა "საქართველოს ახალგაზრდა იურისტთა ასოციაციის" წარმომადგენელმა ქეთევან ჭულუხაძემ დაწერა. როგორც ჭულუხაძემ დააფიქსირა, ამ უბანზე ერთიან სიაში 861 ამომრჩეველია რეგისტრირებული, ხოლო მიღებული ბიულეტენების რაოდენობა 800–ია. რაც ნიშნავს, რომ 61 ბიულეტენით ნაკლები აქვთ მიღებული.

მასვე ეკუთვნის ამ უბანზე დაწერილი მეორე შენიშვნაც, რომელიც გადასატან ყუთთან დაკავშირებით დაიწერა.

ქეთევან ჭულუხაძე ამბობს, რომ წილისყრა 07:20 საათზე ჩატარდა, რის შედეგადაც გამოვლინდა ორი ადამიანი, რომელიც გადასატან ყუთს უნდა გაჰყოლოდა: "ამათგან ერთ–ერთი "ერთიანი ნაციონალური მოძრაობის" წარმომადგენელი იყო. მან გაყოლაზე უარი განაცხადა. ამის შემდეგ, კომისიის თავმჯდომარემ გადაწყვიტა გადასატან ყუთს ერთი ადამიანი გაჰყოლოდა, რაზეც მას შენიშვნა მივეცი. შემდეგ კი კომისიის თავმჯდომარემ თვითნებურად შეარჩია მეორე პირი, რომელიც ყუთს გაჰყვებოდა. მე მოვითხოვე წილისყრის ჩატარება ხელახლა, რაც თავმჯდომარემ გაითვალისწინა".

იგივე ფაქტზე დაიწერა საჩივარიც, რომელიც "სამოქალაქო მოძრაობა მრავალეროვანი საქართველოს" წარმომადგენელმა დაწერა.

35–ე საარჩევნო უბნის თავმჯდომარე ანზორ ბარძიმაძე ინფორმაციას, რომ თითქოს აპირებდა ერთი კაცი გაეყოლებინა გადასატანი ყუთისთვის, სიცრუეს უწოდებს. როგორც ბარძიმაძე ამბობს, მას შემდეგ რაც "ნაციონალური მოძრაობის" წევრმა უარი განაცხადა გაყოლაზე, მას უფლება ჰქონდა მის ნაცვლად ვინმე გაეგზავნა.

ამავე უბანზე ხმის მისაცემად მისულმა მარგარიტა ჩუტკერაშვილმა აღმოაჩინა, რომ მისი მონაცემები ერთიან სიაშიც იყო და გადასატანი ყუთის სიაშიც. თუმცა, ორივე სიაში სხვადასხვანაირად იყო დაფიქსირებული.

35–ე უბანზე ერთიან სიაში 861 ამომრჩეველია რეგისტრირებული, სპეც სიაში 10, გადასატანი ყუთის სიაში კი 26 ამომრჩეველი. 15:00 საათის მონაცემებით აქ არჩევანი 264–მა ადამიანმა გააკეთა.

რაც შეეხება აწყურის კიდევ ერთ უბანს, მე–14 საარჩევნო უბანზე ერთიან სიაში რეგისტრირებულია 1118 ამომრჩეველი, გადასატანი ყუთის სიაში კი 34. 15:00 საათის მონაცემებით ხმა 495 ამომრჩეველმა მისცა. აქ შენიშვნა ან საჩივარი არ დაფიქსირებულა.

[sknews.ge]