ადიგენი და არჩევნები

1 ოქტომბრის საპარლამენტო არჩევნებთან დაკავშირებით ადიგენის მუნიციპალიტეტში მცხოვრებთა დამოკიდებულება არაერთგვაროვანია.

”სამხრეთის კარიბჭეს” მიერ გამოკითხული 12 რესპოდენტიდან უმრავლესობა პოზიტიურადაა განწყობილი და ფიქრობს, რომ არჩევნების შემდგომ მუნიციპალიტეტში ცხოვრების პირობები გაუმჯობესდება. ამ დასკვნას პარიტებისა და კანდიდატების დაპირებების საფუძველზე აკეთებენ.

თუმცა, მსგავს ოპტიმიზმს ყველა ვერ იზიარებს. რესპონდენტების ნაწილი ფიქრობს, რომ ხელისუფლებასაც და პარტიებსაც ხალხი მხოლოდ არჩევნების დროს ახსენდებათ. ამის ნათელი მაგალითი გასული წლების არჩევნები და დაპირებებად დარჩენილი დაპირებებია.

გამოკითხულ რესპონდენტთა ნაწილი ამბობს, რომ პარტიების პროგრამებს უკვე გაეცნო და გადაწყვეტილებაც მიღებული აქვს. ნაწილი პროგრამებს არ იცნობს და არჩევანის გაკეთებას ისე აპირებს, მათ გაცნობას საჭიროდ არც მიიჩნევს. იყვნენ ისეთებიც, ვინც გვითხრა, რომ მიუხედავად იმისა, რომ მმართველ გუნდს ბევრ საკითხებში არ ეთანხმება, არჩევანს მაინც მის სასარგებლოდ აპირებს, რადგან სხვა ალტერნატივას ვერ ხედავს.

რაც შეეხება პრესასთან ღიად საუბარს, უმრავლესობამ კომენტარზე უარი გვითხრა. ვინც ღიად გვესაუბრა, ყველამ მმართველი გუნდის მხარდაჭერა გამოხატა. ისინი კი, ვისი კეთილგანწყობაც ოპოზიციური ძალების მისამართით იხრებოდა, მხოლოდ პირად საუბარსა და ანონიმებად დარჩენაზე დაგვთანხმდნენ.

პასუხს ყველა რესპონდენტს ერთსა და იმავე კითხვებზე ვთხოვდით - იცნობენ თუ არა მაჟორიტარ კანდიდატებსა და პარტიის პროგრამებს. რის მიხედვით გააკეთებენ არჩევანს და რას ელოდებიან არჩევნების შემდგომ პერიოდში.

ირმა ზაზაშვილი, დაბა ადიგენი, (დასაქმებულია, თუმცა სად არ ამხელს): ”ყველა პარტიის მაჟორიტარობის კანდიდატს ვიცნობ, მეტნაკლებად ვიცი მათი პარტიის პროგრამებიც, მაგრამ მხარს ზურაბ ჩილინგარაშვილს ვუჭერ. დარწმუნებილი ვარ უმრავლესობა ხმას მისცემს და გაიმარჯვებს. ”ნაციონალური მოძრაობის” პროგრამა უფრო სანდო და რეალურია”.

ნონა ლობჟანიძე, დაბა ადიგენი, უმუშევარი: ”მეც და ჩემი მეუღლეც უმუშევრები ვართ. არანაირი შემოსავალი არ გვაქვს, მაგრამ მხარს მაინც ამ მთავრობას ვუჭერ. იმიტომ კი არა რომ ვინმესი მეშინია, ამაზე კარგი კანდიდატი არ გვყავს. სხვა ვინ უნდა მოვიდეს?! ღმერთმა დაგიფაროს”

ბადრი ჩიტორელიძე, დაბა ადიგენი: ”არის პერსპექტივები, ყველა გვპირდება და შეიცვლება რაღაც. ზურა ჩილინგარაშვილის ვიცნობ, კარგი კაცია, მჯერა, რომ ეს პარტია სოფლის მეურნეობას ააღორძინებს. ვაუჩერების დარიგებასაც გვპირდებიან. ალბათ გლეხებსაც გვეშველება”.

შუახნის ქალბატონი, სოფელი მოხე: ”ისეთ კანდიდატს შემოვხაზავ ვინც მეტ სამუშაო ადგილებს შექმნის და ვინც სოფლის ახალაზრდობას დაასაქმებს”.

რომან ბარბაქაძე, მეწაღე: ”პირველი ჯგუფის ინვალიდი ვარ, შვიდსულიან ოჯახში შემოსავალი მარტო მე შემაქვს. ერთადერთი რეალური კანდიდატი მხოლოდ ნაციონალურ პარტიას ყავს”.

მურად კიკაბიძე, პენსიონერი: ”მმართველ პარტიას ვაძლევ ხმას, თუმცა ბევრ საკითხებში არ ვეთანხმები. მაგალითად, მილიონები იხარჯება კონცერტებისთვის, სახელმწიფო მოხელეების ხელფასებისთვის, მათი მანქანებისთვის, თურმე სახელმწიფოს აქვს ამის საშუალება. ხომ შეიძლება პენსიონერსაც მოუმატონ პენსია და ცოტა ჩვენს ამოვისუნთქოთ?! ყველა პარტიას საარჩევნო პროგრამები ერთმანეთისგან აქვს გადაქსეროქსებული. ყველა გვპირდება გამარჯვების შემთხვევაში უკეთეს ქვეყანაში ცხოვრებას, მაგრამ მაინც ვფიქრობ, რომ ყველა უნდა წავიდეთ არჩევნებზე და საკუთარი არჩევანი დავაფიქსიროთ. პირველ ოქტომბერს ჩვენი ქვეყნის ბედი წყდება”.

35 წლის მამაკაცი, სოფელი შოლავერი: ”კანდიდატებს ყველას არა, მაგრამ პარტიებს ყველას ვიცნობ და ვიცი ვინ რას გვპირდება. მაგრამ არცერთი დაპირების არ მჯერა, ბევრი მოგვისმენია, შესრულებული ცოტა გვინახავს. დამთავრდება არჩევნები და არცერთი კანდიდატი ერთხელაც არ ჩამოვა რაიონში ხალხთან. არჩევნებზე მივალ, რის მიხედვით გავაკეთებ არჩევანს ეგ ჩემი საქმეა”.

მალხაზ ვაშაყმაძე, სოფელი ნამინაური: ”ნაციონალი ვარ და მათ პარტიაში ვიქნები ბოლომდე. სხვა პარტიები არ ვიცი და არც მაინტერესებს. მჯერა, ჩვენ გავიმარჯვებთ და რასაც გვპირდებიან ყველაფერი შესრულდება”. (ს.კ.საპრეზიდენტო არჩევნები ტარდება თუ საპარლამენტო ვერ აკონკრეტებს).

[თინათინ ზაზაძე, ადიგენი]