NDI: 17% „ოცნებას“ 13% კი „ნაციონალებს“ უჭერს მხარს

ეროვნულ-დემოკრატიულმა ინსტიტუტმა (NDI) ივნისში ჩატარებული კვლევის მეორე ნაწილი გამოაქვეყნა.

გამოკითხულთა 67% არჩევნებში მონაწილეობის მიღებას აპირებს, 33% კი არა. მათ შორის ვინც არჩევნებში მონაწილეობის მღებას არ აპირებს, უმრავლესობა ახალგაზრდები არიან. უმცირესობათა დასახლებებში გამოკითხულთა 58% არჩენვებში მონაწილეობის მიღებას გეგმავს, 42% კი აცხადებს, რომ სავარაუდოდ არჩევნებზე არ წავა.

გამოკითხულთა შორის ჭარბობს, ისეთი ამომრჩეველი, რომელსაც ჯერ არ აქვს გადაწყვეტილი თუ ვის მისცემს ხმას (57%). რესპონდენტების 38%–ს კი უკვე გადაწყვეტილი აქვს ვის დაუჭერს მხარს.

უმცირესობათა დასახლებებში 58%–მა არ იცის თუ ვის მისცემს ხმას. 31%–ს კი გადაწყვეტილი აქვს.

შეკითხვაზე, რომელი პარტია დგას თქვენ შეხედულებებთან ყველაზე ახლოს, 27% აცხადებს, რომ არცერთი, 19% ამბობს, რომ „ქართული ოცნება – დემოკრატიული საქართველო“, 15%–ის თქმით, „ერთიანი ნაციონალური მოძრაობა“. ამის შემდეგ მოდის 5% „სახელმწიფო ხალხისთვის“, ასევე 5 % „პატრიოტთა ალიანსი“.

ასეევ შეკითხვაზე, ხვალ რომ საპარლამენტო არჩევნები ტარდებოდეს, რომელ პარტიას/გაერთიანებას მისცემდით ხმას, 38% აცხადებს, რომ არ იცის. 17% მხარს „ქართულ ოცნებას“ უჭერს, 13% „ნაციონალურ მოძრაობას“, 4% „მოძრაობა სახელმწიფო ხალხისთვის". იგივე შეკითხვაზე, იმ ამომრჩევლებს შორის, რომლებსაც არჩევნებში მონაწილეობის მიღება გადაწყვეტილი აქვთ 19% „ქართულ ოცნებას“ ასახელებს, 14% „ნაციონალურ მოძრაობას“. 35 % კი ამბობს, რომ არ იცის.

გადაწყვეტილ ამომრჩევლებეს შორის ისევ ლიდერობს „ქართული ოცნება“ (32%), მის შემდეგ პროცენტული მაჩვენებლით „ნაციონალური მოძრაობა“ მოდის (26%).

კითხვაზე, აპირებთ თუ არა ხმა იგივე პოლიტიკურ პარტიას, გუნდს მისცეთ, ვისაც 2012 წლის საპარლამენტო არჩევნებში მიეცით, 57% აცხადებს, რომ დიახ, 27% კი ამბობს რომ არა.

გამოკითხულთა 36 % ფიქრობს, რომ ხვალ თუ არჩევნები იქნება, „ქართული ოცნება“ გაიმარჯვებს. 11% კი ვარაუდობს, რომ გამარჯვებული „ნაციონალური მოძრაობა“ იქნება.

რესპონდენტების 21% ამბობს, რომ „ნაციონალურ მოძრაობას“ ხმას არასოდეს მისცემდა. 19% კი „ქართულ ოცნებას“ არ დაუჭერდა არასოდეს მხარს.

გამოკითვის მიხედვით, ისინი ვინც არჩევნებზე აპირებენ წასვლას, მაგრამ არ აქვთ გადაწყვეტილი ვის მისცემენ ხმას, ამბობენ, რომ მათი მხარდაჭერა დამოკიდებული იქნება მთელ რიგ საკითხებზე, მათ შორის პარტიების ეკონომიკურ პოლიტიკაზე (41 %), ჯანდაცვის პოლიტიკაზე (15 %) და ეროვნული უსაფრთხოების სტრატეგიაზე (10 %).

NDI–ის კვლევა 2016 წლის 8 ივნისიდან - 6 ივლისის პერიოდში, საქართველოს მასშტაბით მიმდინარეობდა და სულ 4,113 პირი გამოიკითხა.

[sknews.ge]