30 მაისს ახალციხეში მოქალაქეებს უფასოდ გამოიკვლევენ

„ამიერკავკასიის ექიმთა ლიგის“ წარმომადგენლები უფასო გამოკვლევებს ახალციხეში თამარაშვილის ქუჩაზე მდებარე კლინიკა „ჯანმრთელობის სახლში“ ჩაატარებენ. ადგილობრივებს გამოიკვლევენ სხვადასხვა დაავადებებზე: ალერგოლოგია – ბრონქული ასთმა, ალერგიული რინიტი, ალერგიული კონიუქტივიტი, ჭინჭრის ციება, კვინკეს შეშუპება, ატოპიური დერმატიტი.

„პაციენტებს გავსინჯავთ ნული ასაკიდან ბოლომდე და მოვემსახურებით ყველას, ვის გასინჯვასაც მოვასწრებთ“, – ამბობს „ამიერკავკასიის ექიმთა ლიგის“ დამფუძნებელი, ალერგოლოგ– იმუნოლოგი ბაია ბეზარაშვილი.

მასთან ერთად, ხვალ მოქალაქეებს გასინჯავენ ალერგოლოგი რუსუდან ქარსელაძე, დერმატოლოგი ხათუნა ღურჭუმელაძე და ფტიზიატრიის დეპარტამენტის ასოცირებული პროფესორი კახა ვაჭარაძე.

„რაც ყველაზე მნიშვნელოვანია ამ რეგიონისთვის, გავსინჯავთ პაციენტებს ფილტვის სხვადასხვა დაავადებებზე, სუნთქვის უკმარისობაზე. ამ მხრივ პრობლემების სტატისტიკური მაჩვენებელი რეგიონში დიდია“, – აცხადებს ბეზარაშვილი.

დღეს „ამიერკავკასიის ექიმთა ლიგის“ წარმომადგენლები მესხეთში დასაქმებულ ექიმებს მედიცინაში დანერგილი სხვადასხვა სიახლეების შესახებ ტრენინგს უტარებენ.

ბეზარაშვილის თქმით, მათი რეგიონში სტუმრობა ახალციხის მერიის ხელშეწყობითა და მოწვევით მოხდა.

[თამუნა უჩიძე, ახალციხე]